Dialectike ofte bewysconst

[p. 22]

Definitie XVI.

Gheslachte, is een ghemeene name an verscheyden Specien, ende Specien sijn, die een Gheslachte tot ghemeene naem hebben.
Verclaringhe.

ALs Dier, is een naem ghemeen an Mensche, Peert, Stier, &c. want yemandt vraghende wat een Mensche, een Peert, een Stier sy, men antwoort op elck eyghentlick, een Dier; Dier dan is Gheslachte, diens Specien Mensche Peert, Stier, ende voort alle Beesten; Alsoo oock is Ambacht Gheslachte, diens Specien sijn Timmeren, Metsen, Smeden, &c. Want Yeder van dien is Ambacht; Wederom Conste, is Gheslachte van Specien, Ambacht, Rhetorike, Musike, &c. want yeder van dien is Conste; Hollander, is Gheslachte van allen den Ingheborenen van Hollandt, ende dese diens Specien, want soo wel den Leyenaer, als den Haarlemmer, wort eyghentlick Hollander gheseyt; Insghelijcx is Mensche Gheslachte, van Specien, Pieter, ende Ian, want yeder van haer is Mensche.

De Specie die in ander Specien Onscheydelick is, wort ghenoemt de Leechste Specie, oft het Onscheydelick; Als scheydende Dier in Mensche ende Beeste, Mensche wederom in Pieter, Ian, &c. dese laetste Specien en connen niet voorder

[p. 23]

ghescheydt worden, daerom sy de Leechste Specie, ofte het Onscheydelicke ghenoemt sijn. Men soude dese name Specie, door een ander nieuwe mueghen Verduytschen, maer sy schijnt door de ghewoonte claerder, dan t'ghene men in haer plaetse soude connen setten. Breeder sullen wy van desen spreecken int Aenhangsel.