Dialectike ofte bewysconst

Definitie VII.

Menichvuldicheyt, is die deeldelick is in deelen.
Verclaeringhe.

Als Grootheyt (diens drie specien Lichaem, Plat, Linie) ende Ghetal, want sy deelelick sijn

[p. 10]

in deelen, worden Menichvuldicheyt ghenoemt. Dit woort Menichvuldicheyt, ontmoet hem inde ghebruyck van spreecken onder anderen aldus: Ick neme dat Pieter seer groot van persoon sy, onder hem hebbende eenighe Heerlickheyt, die hem bycans eenen Daelder t'siaers uyt brengt, ende dat yemant seght desen een seer groot Heere te wesen; Aen de welcke men verantwoort, dat hy is groot van Menichvuldicheyt, maer niet van Ghedaente, ofte als sommighe Duytschen Onduytschelicker inde gebruyck hebben groot van Quantiteyt, maer niet van Qualiteyt. Also seggen wy wel vijf Sieren even te sijn aen vijf Elefanten, maer naer de Menichvuldicheyt des Ghetals.

Voort so worden de saecken naer de Menichvuldicheyt gheseyt Even, ofte Oneven, als een Driehouck, can Even sijn aen een Vierhouck, een Mensche aen een Calf, maer sy en connen niet eyghentlick Ghelijck ghenoemt worden, want hem dit voucht tot de Ghedaente, als wy inde volghende definitie daer af spreecken sullen: Op welcke eyghenschap ende onderscheyt, van Even ende Ghelijck, in onse Duytsche tale beter ghelet dient, dan het schijnt datmen tot als noch ghedaen heeft: Andersins men sal dickmael, noch Mathematikelick, noch Physikelick, van eenighe materie connen handelen, aenghesien Even, dat de Latijnen AEqvale noemen, al wat anders is dan Ghelijck, dat by den Latijnen Simile gheseyt wort.