Het Werck ofte de Daet, is dat uyt de Oirsaecken bestaet.
Verclaeringhe.
Uyt de oirsaecken, dat is uyt de Vier oirsaecken, Als de Tonne is een werck diens Materie is Hout, de Forme haer ghedaente der uytersten, hare Maeckende oirsaecke, den Cuyper, de Eyntlicke oirsaecke om Bier, Harinck, ofte dierghelijcke in te doen: Alsoo oock wort de Schoe gheseyt t'werck des Schoemaeckers; Vroilickheyt, Stoutheyt, Dronckenschap, ende meer andere, sijn wercken des Wijns: Der Dialectiken Wercken ofte Daden, sijn vele Gheleerde Mannen voort te brenghen, die de Ghemeene Saecke in alle billicheyt, ende met love connen regieren, ghelijck daer af overvloedighe exempelen sijn, by den Romeynen ende Griecken. Dit woort ontmoet hem dickmael inde ghemeene sprekinghe, ghelijck alsmen seght, dat Pieter neerstich is, blijckt by de Wercken, of metter Daet.
Auteursrechtvrij