Diversche refereynen ende liedekens, uut Hollant, ende Zeelant

van verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580

[fol. F3v]

Een nieu Liedeken tot lof van Rethorica,

Opde wijse Wel aen schoon lief ghepresen.

Waect op ghy Edel gheesten
Wilt inde Const voleesten
En soo sulde ghy scheppen vreucht en Iolijt
Sy is een vande meesten
De waerheyt wil zy queesten
Ende dat in spijt, van alle diet benijt,
Dus met des Consts vyanden strijt
En toont v vroom in swerelts crijt
Soo worden wy verblijt.

O conste weert ghepresen
Wt v is meest gheresen
De waerheyt, diemen nu alomme openbaert
Daerom suldy mits desen
Ock niet slaperich wesen,
Maer thoonen altijt v conste wijt vermaert
Volhert toch vrij, zijt onvervaert
Ghebruyct altijt der consten aert
Want wy met v zijn ghepaert.

Ghy leert ons componeren
Lustich Ortigrapheren
En met schriptura schoon, maken wy oock solaes,
Fraey doet ghy ons ageren
Schoon consten inuenteren
Door de Poësy van veel veracht eylaes
Philosophy door s’gheests gheblaes
Sticht oock sonder te maken dwaes
Al meynent vele met gheraes.

[fol. F4r]

 

Godes woorden vol trouwen

 

Deet ghy seer fraey ontfouwen,

 

Ontdeckende alsoo des Antechristus staet,

 

Waer door mannen en vrouwen

 

Op v stijf ghingen bouwen

 

Als die ghefondeert vonden, uwen schoonen praet,

 

V Edel wesen en ghelaet

 

Verquict menich hertken delicaet

 

Dat bedroeft is en versmaet.

 

 

 

Ghy Princen ende Heeren

 

Al die dees Conste eeren

 

Neemt in danck, ons simpel, slecht, vermaen,

 

Wilt altijt neerstich leeren

 

En al sonder verseeren

 

Castijt sonder verwijt, soo wy ons ontgaen

 

Van all’ afgonst vliet nu seer saen

 

Ter eeren de const is dit ghedaen

 

Om v vant quaet te raen.

Castyt sonder verwyt.

Finis.