Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio E2r] [fol. E2r] Refereyn vande Violieren In nieuwen Koren. Vvij Violierkens die const beminnen vry Tspruyt wt ionckheyt is ons aduijs, Prijs hopen wy te crijghen met moede bly Ghy die in consten expert zijt en wijs Neemt acht op de conste als een bloeyende rijs Schout [...] oft schimpighe reden quaet, Overdenckt den voorleden seer Propijs Hoe Rethorica doen triumpheerde in heuren staet By Maximilianus tijden, seer delicaet Sijnde Hertoghe van Oostenrijck verheuen Doen wasse in haren spoet den sin wel vaet Door den goeden tijt diemen mocht beleuen, Conste comt ons nu weder aen boort ghedreuen Alleen twist en onconst willen wy bedeluen Lijt deen des anders fouten, soo kent ghy v seluen. O goeden tijt die nu zijt verdreuen Deurt oorlochs gherucht, aen allen cant In wat voorspoet heeftmen tNederlant sien beleuen In voorleden tijt byden Graue van Oosterbant Doen wast lant in rusten seer diamant Willem die vierde oock seer lustich en wijs Aelbrecht Hertoghe van Beyeren, vatet verstant Was wel bekent, stout in orloghen propijs Willem de vierentwintichste Graue deuijs Hielt oock de Landen in rusten met goeder vreden Doen mochtmen conste toonen met goeder gijs Och goeden tijt ghy zijt al gheleden Laet ons Godt bidden met vieriger beden Dat hy den Tirant wil laten verweluen Lijt deen des anders fouten, soo kent ghy v seluen. [Folio E2v] [fol. E2v] Gy Carolus tijden waren de landen in vreden Doen mochtmen conste toonen seer triumphant Nv sidt onsen Coninck in swaricheden Onder de Spaensche Inquisitie, deirlijck vermant Waer door dat oock is verdoruen zijn Nederlant Deur de Spaignaerden, fel aen alle zijden Me vrou van Parmen quam met onverstant En bracht aen allen cant, zijn Landen in lijden, Ducq d’Alve den quant, quam oock bestrijden Met zijn Spaens ghebroetsel ons Landen soet Hy quam den Adeldom in felheyt berijden: Als den Edelen Graue van Horen en Egmont goet, Veruolgende dat Edele geslacht van Nassouwe vroet Maer wt den Lande moest hy gaen steluen Lijdt deen des anders fouten, soo kent ghy v seluen. Prince. Princelijcke Prince van Orangje crachtich Machtich bloet van Nassouwen ghepresen Ten desen, wilt ons toch zijn aendachtich Gy uwer edelheyt, hooch wtghelesen Onder uwe vleughelen willen wy bedect wesen Als bescherm-Heer van onse Nederlanden soet, Want v vroom hert is tot ons gheresen In vroomheyt ghepresen zijt ghy zeer goet Geuende dese schoone Landen eenen moet Dies moetmen v lof geuen tot allen steden, Wy Violierkens leuen in goeden voorspoet Deurt Nassouwen bloet in goeder vreden Prijs (segge wy) de Const-beminders, tis ooc wel reden Schoon bouen alle bloemen, haer druyfkens sweluen Lijdt deen des anders fouten, soo kent ghy v seluen. Tspruyt wt Ionckheyt, Nieuwenhoven. Vorige Volgende
Auteursrechtvrij