Gulde-jaers feest-daghen of den schat der geestelycke lof-sangen gemaeckt op elcken feest dagh van 't geheele Iaer



[Folio *vj v]
Op de Lof-Sangen der Heylighen, ghemaeckt door den Eerw. Heer Ian Stalpaert. STALPAERT vvas dat u vvil dat ghy ons vvild' onterven Van u volmaeckte sangh belooft soo menich vverven? VVas dat u zin dat g'ons Godts vrolickheydt onthiel? Die nu vvel duysent mael versuchten om u Ziel! Ontschuldicht vvaerde stem mijn onbedachte vraghen! Ick vvil u zin en stem gaen door de vvereldt draghen, Hoort kinderen: 'tvvas soo niet als ick u heb gheseydt; Iets anders vvas het daer zijn sin heeft nae ghebeydt, Nae dat hy metter daed Gods daden gingh beleven, En sanghbaer op de maet Godts helden had beschreven, Gheluyd ontbrack daer aen, vvaer sal hy't halen gaen? Hier in een vvarrich dal, en 's vverelts Rasebaen? Hier, daer Amphion noyt sijn snaren-spel sou raken, Daer Orpheus sijn sangh vvel eer had moeten staken, Hier, daermen ballinghen verr' vanden Hemel svveeft, Hier, daermen verr' van huys niet dan in droefheyt leeft. O Rechten Stelder van Godts hemelsche Lofsanghen! O Hooghen Schencker na ons yverich verlanghen! Na dat u zielen-snaer soo langh ghereckt vvas uyt Tot datse vvas ghestelt op't hemelsche gheluyt, Op dat ons sangh te meer na t'hemels sou ontfoncken, VVt d'Hemel hebt ghy ons den rechten toon gheschoncken. V leste sangh die ghy nu blyder singht als vvy, O blijschap sonder end! o vreucht! o melody!