Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Wanneer men gheloeften ende raet breken sal ende mach. C. XXXII.

 
HEre / hier vore seydic u dat.
 
Nu willict u verclaren bat.
2000
Al hebdi ghenomen raet
 
Daer om en suldi / dat verstaet /
 
Met dien rade niet voert gaen
 
Ghine hebt yrstwers wel verstaen
 
Of die raet si orberlijc.
2005
Men mach oec waerlijc
 
Gheloeften breken sulken stont.
 
Om vele saken / si u cont;
 
Deen es wanneer men u breect
 
Gheloeften die men u toe spreect /
2010
So moghedi duwe weder breken.
 
Wet dat die loye spreken:
 
Als oec nuwe saken comen
 
Daer af men niet en hadde vernomen
 
Eer men die gheloefte dede
2015
Dat machmen verwandelen mede;
 
Want te dien dinghen spade en̄ vroe
 
Die van nuwes comen toe /
 
Daer hoert toe wel nuwen raet.
 
Na dat der zaken toe gaet
2020
Worde uwen raet oec / sulken stont /
 
Ghemaect uwen vianden cont;
 
Dien mochti oec muteren /
 
Dit es Senecas leren.
 
Haddi oec in eneghen daghen
2025
In rade over .j. ghedraghen /
 
En̄ ghi namaels wort gheware
 
Dat dien raet niet goet en ware /
 
Sondelijc of jeghen recht
 
Ghi mochtene wandelen echt /
2030
Of jeghen tghebot ons Heren:
 
Ghi mochtene wandelen met eren.
 
Van gheloeften / wilt oec verstaen /
 
Haddi gheloefte yemanne ghedaen
 
Dat lelijc waer ende quaet/
2035
Waert dat volquame die daet /
 
Of dies ghi en hadt gheen macht /
 
Die gheloefte en heeft gheen cracht.
 
Haddi oec ghedaen sulc belof
 
Daer ghi meer mocht ghedeert sijn of /
2040
Dant hem mochte in staden staen
 
Dien ghi tgheloefte hadt ghedaen /
 
Dat mochti oec muteren
 
Also ons die rechte leren;
 
Want dat meeste orbore men sal
2045
Meest voert setten over al.
 
Die vroede en lieget niet int leste
 
Sonder loghene / dat eest beste;
 
En̄ hebdi gheloeft in enegher tijt
 
Dinc dies ghi niet mechtich en sijt /
2050
En̄ dat ghedaen met eden /
 
So suldi gaen ghereden
 
Uwen priester te biechtene saen
 
En̄ des penitentie ontfaen;
 
En̄ des ghelijc oec met
2055
Dan allen gheloeften dat wet/
 
Daer sonde in laghe of blame
 
Wert dat ten werken quame.

Vorige Volgende