Basiorum Liber

[p. 24]

Basivm XV

Adducto Puer Idalius post tempora nervo,

Stabat in exitium, pulchra Neaera, tuum:

Cum frontem, sparsosque videns in fronte capillos,

Luminaque argutis irrequieta notis,

Flammeolasque genas, & dignas Matre papillas,

Iecit ab ambigua tela remissa manu:

Inque tuas cursu effusus pueriliter ulnas,

Mille tibi fixit basia, mille modis,

Quae succos tibi myrteolos, cypriosque liquores

Pectoris afflarunt usque sub ima tui:

Iuravitque deos omneis, Veneremque parentem,

Nil tibi post unquam velle movere mali.

Et miremur adhuc cur tam tua basia fragrent?

Duraque cur miti semper amore vaces?