Nieuwe testament (Noordnederlandse vertaling)

XVI

Ende ic hoerde een grote stemme van den hemel, segghende den zeven enghelen: Ghaet ende stort uyt die zeven fiolen der gramscappe Godes in der eerden.

Ende die ijrste ghinc heen ende stortede sine fiole vyt in der eerden ende in al den ghenen die den karacter der beesten hadden, ende in den ghenen die sijn beelde aenbeden, is gheworden een wrede herde boze wonde.

Ende die ander enghel stortede sijn fiole uyt in der zee ende het is bloet gheworden als eens doden, ende alle levende ziele is in der zee ghestorven.

Ende die derde enghel stortede sijn fiole uyt in die ryviren ende op die fonteynen der wateren, ende het is bloet gheworden.

Ende ic hoerde den enghele der watere segghen: Here, du biste gherechtich, die daer heylich biste ende waerste, wanttu deze dinghe gheordelt hebste. Om dat si der heyligher apostelen bloet uyt ghestort hebben, soe hebstu hem oec tbloet ghegeven toe drinken alsoe als sijs weerdich sijn.

Ende ic hoerde enen anderen enghel segghen: Het is alsoe, Here, almechtich God, dijn ordele sijn gherechtich ende warachtich.

Ende die vierde enghel storte sine fyole uyt in der zonnen ende hem is gegheven die menschen toe ghezelen mit hetten ende mit vuere. Ende die menschen branden in groter hetten ende blasphemierden den name Gods, die de macht hadde over die plaghen, ende si en deden gheen penitencie, op dat si dien Gode die glorie solden gheven.

Ende die vijfte enghel stortede sine fiole uyt op den stoel der beesten, ende sijn rijc is duyster gheworden, ende si aten haer tonghen toe zamen van rouwen, ende si blasphemierden Gode des hemels van haren we ende van haren wonden, ende si en deden ghene penitencie van haren werken.

Ende die seste enghel storte sine fiole uyt in Eufraten, der groter riviren, ende verdrogede haer water, op dat den coninghen van den opganc der sonnen die wech bereydet worde.

Ende ic sach uyt des draken monde ende uytter beesten monde ende uten valschen propheten monde drie onreyne gheesten uyt ghanghen wesen in der maniren van vorschen, want si sijn gheeste der viande ende doen mirakele,

[fol. 172v]

ende si ghaen voert tot allen coninghen van al der eerden, die te vergaderen in den strijt totten groten daghe des almechtighen Godes.

Ende sich, ic come als een dief. Salich is hy, die waket ende die sijn cledere behoet, dat hi niet naket en wandere ende sine lelicheyt besie. Ende hi salse vergaderen in een stede die in Ebreeuschen ghehieten is Hermagedon.

Ende die sevende enghel stortede sijn fiole uyt in die lucht ende daer ghinc uyt een grote stemme uten tempel, van den throne, ende seyde: Het is ghedaen. Ende het ghesciededen blixene ende stemmen ende donreslaghe, ende die eertbevinghe is alsoe groet gheworden hoe sulc nye en was van dien, dat die menschen opter eerden waren, alsulken eertbevinghe alsoe groet. Ende die grote stat is ghebroken in drien stucken ende die steden der heydene sijn ghevallen. Ende die grote Babilon is ghecomen in der ghehoechnisse by Gode, haer toe gheven den kelic des wijns der onwaerdicheden sijnre gramscap. Ende elc eylant vloech ende die berghe en sijn niet ghevonden. Ende groet haghel als een ghewichte is van den hemel ghevallen op die menschen, ende die menschen blasphemiren Gode om die plage des hagels, want hi haestelic mit ghewelde groet gheworden is.