Nieuwe testament (Noordnederlandse vertaling)

IIII

Na desen dinghen sach ic, ende sich, [een] opgheloken dore in den hemel, ende die ijrste stemme [,die ic hoerde,] was recht als eenre bazunen stemme, die mit my sprach, ende seyde: Clim hijr op ende ic sal dy tonen, wat cort hijr na ghescien moet. Ende rechte voert was ic in den gheeste ende sich, een setel was in den hemel gheset ende een sitter opten stoel. Ende die daer sat, was ghelijc den ghesichte eens steens, die jaspis hiet ende sardinis, ende een reghenboghe was in den ommeganghe des setels ghelike den ghesichte eens steens die smaragdus hiete. Ende in den ommeghanc des stoels vier ende twintich setelen ende sittende op die setelen xxiiii oelde, omme behanghen mit witten clederen ende guldene cronen op haer hovede. Ende uten throne quamen blixenen voert ende stemmen ende donreslaghe, ende seven bernende lampen voer den throne, die de seven gheeste Godes sijn. Ende in den aensichte des setels als een glasene zee ghelijc cristal. Ende in den middel des zetels ende inden ommeringhe des zetels vier dieren vol oghen voer ende achter.

[fol. 165r]

Ende dat ijrste dijr was ghelijc den lewe ende dat ander dier ghelijc den calve, ende dat derde dijr hadde eens menschen aensicht ende dat vierde dier was ghelijc den vlieghenden aerne. Ende die vier dyren yeghelic haerre hadden ses vloghele ende sie sijn binnen vol oghen ende inden ommeringhe mede, ende si en hadden gheen ruste dach ende nacht, segghende:

Heylych Heer God almechtich, die was ende die is ende die toe coemen sal.

Ende doe die vier diere die glorie ende die ere ende die benedijnghe solden gheven den sittenden opten trone, den levende van ewen toe ewen, doe knielden die xxiiii oelde neder voerden sittenden in den throne ende aenbeden den levenden in ewen tewen ende leyden hoer cronen voer den trone ende seyden:

Here onse God, du biste weerdich, glorie ende ere ende moghentheyt te ontfanghen, want du hebste alle dinch ghescapen ende na dinen willen waren si ende sijn ghescapen.