en hebbe. Doe antworde Festus, die den Joden lieve wolde doen, ende seyde tot Paulum: Wilstu te Iherusalem op ghaen ende daer dijn ordel van desen dinghen voer my ontfaen? Doe seyde Paulus: Ic sta voer des keysers vier scaer ende daer behoert my mijn ordel te liden. Ic en hebbe den Joden niet ghehindert alstu wal weetste. Ist dat ic hem ghedeert hebbe of yet ghedaen, datter doet weerdich is, ic wil gheerne sterven, ende ist dat dier dinghen en gheen an my is, daer si my of wroghen, nieman en mach my hem luden over leveren: ic beroep mijn sake voer den keyser! Doe beriet hem Festus mitten rade ende antworde: Du hebste den keyser appelliert, du salste totten keyser ghaen!
Ende doet een deel daghe gheleden waren, quam die coninch Agrippa ende Beronica neder toe Cesarien om Festum willecoem te hieten. Ende doe si daer vele daghe bleven, dede Festus den coninc van Paulo te weten ende seyde: Een man is hijr in die vanghenisse ghelaten van Felix, mynen voersate, van welken, doe ic te Iherusalem was, dat die princen der papen ende die oelde der Joden tot my quamen
ende begheerden jeghens hem, dat hi vero[r]delt worde, ende ic antworde hem, dattet der Romeyn ghewoent niet en ware enighen menschen te verordelen, eer dat die ghene die bezaket is, die wroghers theghenwordich hebbe ende stede neme hem toe beschermen ende sijn onschult te doen. Daer om, doe si hijr ghecomen waren, sat ic sonder merren ten naesten daghe te rechte ende hiete den man voerbrenghen. Ende doene die wroghers te talen setteden, en brochten si gheen sake, daer ic quaet of vermodede, mer si hadden van haerre ewen somighe questien ende van enen doden man, die Ihesus hiete, die Paulus seyt te leven. Doe twivelde ic van dusdanighen questien ende seyde, of hi te Iherusalem wolde ghaen ende daer te rechte staen van desen dinghen. Doe Paulus appellierde, dat hi tot des keysers rechte ghehoelden worde, hiet icken hoelden thent icken senden mach totten keyser. Doe seyde Agrippa tot Festum: Ic begere oec selve den mensche te horen. Morghen, seyde hi, salstune horen.
Des anderen daghes, doe Agrippa ghecomen was ende Beronica mit veel hoecheden ende inder vierscaer gheganghen waren mit richters ende mitten voerbaersten mannen van der stat, doe gheboet Festus, datter Paulus voerghebrocht worde. Ende Festus seyde: Agrippa coninc ende alle ghi manne, die hijr mit ons te gader sijt, siet desen mensche, daer alle die ghemeente der Joden my to Iherusalem over gheclaghet heeft ende bidden, ende hijr ropen si, dat hem niet meer en behoert te leven. Mer ic hebbet ondervonden, dat hi niet ghedaen en hevet, datter doet weerdich is. Daer om, want hi dese dinghe tot den keyser beropen hevet, soe bin ic toe rade gheworden, hem totten keyser toe senden. Ende icken hebbe gheen seker besceyt, dat ic daer of den here den keyser
Auteursrechtelijk beschermd