Nieuwe testament (Noordnederlandse vertaling)
(1979)–Johan Scutken–
Auteursrechtelijk beschermd
[Folio 152r]
| |
Claudius die keyser gheboden hadde, dat alle die Joden vyt Romen mosten scheyden. Doe ghinc hi tot hem ende want hi vander selver consten was, soe bleef hi by hem ende wrochte. Hi was van den ambochte tenten ende pauwelione te maken. Ende hi disputierde inder sinagoghen alle sabbate ende brochte den name Ihesu Cristi mede in ende riet den Joden ende den heydenen. Doe Silas ende Thimotheus van Macedonien ghecomen waren, doe begonste hi dat woert Gods te prediken ende bewijsden den Joden, dat Ihesus Cristus ware die Gods zone. Si wederseyden ende blasphemierden ende Paulus scuddede sijn clederen ende seyde tot hem luden: Ju bloet si op ju hoeft; van deser tijt ga ic sonder misdoen totten heydenen. Doe voer hi van dan ende ghinc in eens mans huys, die Titus die gherechtighe gheheyten was ende Gode oefende, wies huys ander synagogen ghevoghet stont. Ende Crispus, die overste van der synagoghen, ghelovede den Here mit alle sinen huze ende veel van dien Corinthen, diet hoerden, gheloveden ende worden ghedopet. Doe seyde onse Here Paulo toe des nachtes in enen visioen: En ontsich di niet, mer sprec twoert ende en swijc niet. Daer om bin ic mit di ende nieman en sal hem yeghens di setten, dat hi die deere, want veel volcs hoert my toe in deser stat. Doe woende hi daer een jaer ende ses maende ende leerde den volke dat woert Gods. Doe stonden die Joden mit eenre overdrachte mitten rechter, die Gallio hiete, jeghens Paulum ende si brochten voer tghedinghe ende seyden: Ziet, dese man radet den luden enen God te gheloven jeghens die ee. Ende doe Paulus sinen mont op began te doen, seyde Gallio, die rechter, totten Joden: O ghi manne, ghi Joden, waert dat hi enighe broke hadde ghedaen of dat hi een quadie waer, ic dede ju recht over hem, mer sijnt questien van den woerden ende van den dinghen die juwer eeuwen aen ghaen, dat oerdelt selve, van dien dinghen en wil ic gheen rechter wesen. Ende hi dreefse vytter vierscare. Doe grepen si alle Sostenem, enen prince van der sinagoghen, ende sloghen voer die dincbanc, ende Gallio en bewants hem min noch meer. Ende doe hem Paulus noch hijr na the Corinten veel daghe gheleden hadden, beval hi die brueders te Goede ende voer te scepe in Cirien, ende mit hem voer Aquila ende Priscilla, die hem in Chencris thoeft ghescoren hadde, want sijt soe ghelovet hadden te sceren. Ende doe Paulus tot Ephesum quam, liet hi se daer, mer hi ghinc in die sinagoghe ende disputierde mitten | |
[Folio 152v]
| |
Joden. Doe si hem baden, dat hi meer tijts met hem bleve, en wolde hijs niet doen, mer hi bevalse Gode ende seyde: Ic moet den toe comenden feestdach te Iherusalem hoelden, mer wilt God ic sal weder tot ju comen. Aldus voer hi van Ephese ende quam tot Cesariam. Daer clam hi vytten scepe ende grotede die kerke ende hi voer neder tot Anthiochien. Ende doe hi daer een wile gheweest hadde, voer hi voert ende int lant van Galacien ende Frigien ende sterkede van stede te stede alle die jongheren. Doe was inder stat van Ephesum een Jode ghecomen, die hiete Appollo, gheboren van Allexandrien ende was een wal sprekende man, die hem der scrifturen wal verstont. Dese hadde des Heren wech gheleert ende hi was barnende van gheeste, ende hi sprac ende leerde vlitelic die dinghen die Ihesum toe hoerden, mer hi en kenneden anders niet dan Johannes baptisten doepsel. Dese began ghetrouwelic in die sinagoghe te werken. Doe Aquila ende Priscilla hem ghehoert hadden, namen sine tot hem ende bedudeden hem eernstelike den wech des Heren. Ende doe Appollo ghaen wolde in Achayen, screven die brueders aen die jonghers, dat sine ontfanghen solden. Doe hi daer quam, dede hi den ghenen grote stade, die gheloveden, want h. crachtelike die Joden verwan ende bewisede hem Ihesum Cristum doer die scriftureni |
|