Nieuwe testament (Noordnederlandse vertaling)

IX

Saulus was noch vytghirende der dreyghinghe ende der slaeghe in ons Heren jongheren. Hy ghinch tot den prince der priesteren ende eyschede brieve van hem tot den sinagoghen in Damasco, of hy dies weghes enighe manne ende wive ghevonden hadde, dat hi se ghevanghen mochte brenghen in Iherusalem.

Ende doe hi sinen wech makede, ghevielt, dat hy Damascum solde naken ende siet, haestelike omme schen hem een licht van den hemel ende hi viel neder inder eerden, ende hy hoerde een stemme [hem] segghende: Saule, Saule, wat vervolghestu my? Hy seyde: Here, wie bistu? Ende hy antworde: Ic bin Ihesus, dien du vervolgheste. Het is dy hert theghens den prickel weder slactich te wesen. Ende al bevende ende al verwonder[en]de seyde hy: Here, wat wilstu my doen? Ende die Here seyde tot hem: Stant op ende ghanc in der stat ende daer sal dy gheseyt waerden wat di behoert te doen. Ende die manne die mit hem reyseden, stonden vyt verwonderen vervaert; si hoerden die stemme, mer si en saghen nieman. Saulus stont vander eerden op ende mit op gheloken oghen en sach hy niet. Doe toghen sine bi den handen ende brochten in Damascum, ende daer was hy drie daghe ende drie nachte niet siende ende hi en at noch en dranch.

Tot Damasce was een jongher, die Ananias hiete. In enen visione sprac die Here tot hem: Anania! Ende hy antworde: Sich, Here, ic bint. Doe seyde die Here tot hem: Stant op ende ghanc in die steghe, die de rechte steghe gheheyten is, ende soec Saulum Tharcensen in Judas huse, want sich, hy bedet; ende hy sach den man, die Ananias hiete, in gaen ende leyde hem die hande op dat hy dat sien ontfinghe. Doe antworde Ananias: Here, ic hebbe vand[i]en man van den menighen ghehoert, hoe veel quaets hy dinen hilghen in Iherusalem ghedaen heeft, ende hy hevet van den prince der priesteren die macht al hijr te vanghen alle die ghene die dinen name aenropen. Doe sprac die Here tot hem: Ganc, want dese is my een vat der vytvercorenheyt, dat hy minen name draghe voer heydene, voer coninghe ende voer die kinder van Israel, ende ic sal hem toghen, hoe vele hem hoert te liden voer minen name. Ende Ananias ghinc hene ende quam

[fol. 144r]

int huys ende leyde hem die hande op ende seyde: Saule, brueder, die Here Ihesus, die dy openbaerde in dien weghe, doe du quaemste, hevet my ghesent, dattu sien soldeste ende vervullet werden mit den Hilghen Gheest. Ende rechtevoert vielen van sinen oghen recht als visch schellen ende hy ontfinc dat sien, ende hy stont op ende waert ghedoept, ende doe hy die spise namen hadde, is hy starc ghemaect.

Doe was hy een deel daghe mit den jongheren, die te Damasce waren, ende stedelic ghinc hy in den tempel ende predicte den Here, want die die soene Gods is. Ende alle, diet hoerden, verwonderden ende seyden: En is hy dit niet, die sie toe Iherusalem verdreef mit vechten alle die ghene die desen name aen riepen? Ende daer om is hy hijr ghecomen, dat hi se totten princen der priesteren ghevanghen soude brenghen. Ende Paulus waert meer sterker ende maecte die Joden te scanden, die te Damasce woenden, vast beliende, dat dit Cristus is.

Doe veel daghe vervullet waren, maecten die Joden enen raet, dat sine slaen solden, mer haer laghen sijn Saulo gheopenbaert, ende si wachteden oech nacht ende dach die poerten, op dat sine solden doden, mer sijn jongheren namen inder nacht ende lieten neder gaen bi der muren in eenre manden.

Ende doe hi te Iherusalem quam, pijnde hy hem mitten discipulen te menghen, ende si ontsaghen alle ende en gheloveden niet, dat hy een jongher ware. Mer Barnabas namen ende leyden totten apostelen ende vertellede hem, hoe dat hy den Here inden weghe sach ende hi hem ghesproken hadde, ende hoe dat hy in Damasco ghetrouwelike ghewrocht hadde in den name Ihesu. Ende hy was mit den luden in ende vytgaende binnen Iherusalem, ghetrouwelike werkende in den name des Heren. Ende hy sprac mitten heydenen ende hy disputijrde mitten Greken, mer si begeerden hem te verslaen. Doe dat die brueders wisten, leyden sine heen in Cesaream ende lieten te Tarsum.

Ende die kerke hadde vrede doer al Judeen ende Galileen ende Samarien ende wert ghestichtet, wanderende in die vrese des Heren, ende waert vervullet mit den troest des Hilghen Gheestes.

Ende het ghesciede, doe Petrus doer hem allen ghinc, dat hy quam totten hilghen, die te Lidden woenden. Daer vant hy enen menschen, die Eneas heyte, die achte jare in sinen bedde gheleghen hadde; hy was verghictet. Ende Petrus seyde hem: Enea, die Here Ihesus Cristus moet dy ghesont maken, stant op ende maect dijn bedde. Ende rechtevoert stont hi op, ende si saghent alle, die te Lidde ende te Sarone woenden, die welke bekeert sijn totten Heren.

In Joppa was een discipula, een vrouwe, die Tabita heyte, dat beduyt alsoe veel alse Dorcas. Dese was vol gueder werken ende aelmoesen, die si dede. Ende het ghesciede in dien daghen, dat si siec waert ende sterf, ende als si se ghewasschen hadden, leyden si se in die camer. Want Lidda na by Joppe was ende die jongheren hoerden, dat Petrus daer in was, senden si twe manne tot hem ende baden: En vertraghes niet tot ons te comen. Doe stont Petrus op ende quam mit hem. Ende doe hy ghecomen

[fol. 144v]

was, leyden sine in die camer ende alle die weduwen ghenghen om haer staen screyen ende togheden die rocke ende die cledere die hem Dorcas ghemaket hadde. Petrus dede si alle vyt gaen ende sette sine knien ende bedede, ende keerde totten licham ende seyde: Tabita, stant op! Ende si loec die oghen op, ende doe si Petrum ghesien hadde, versat si. Hy gaf haer die hant ende rechtede sie op. Ende doe hy die hilghen ende die weduwen gheropen hadde, bewisede hi se levende. Het is over al Joppen openbaer gheworden ende veel gheloveder in onsen Heren. Het ghesciede, dat hi in Joppe veel daghe by Simon den ledertouwer woende.