sin sijn aderen ende die planten sijnre voete starch ghemaket, ende hy spranc op ende stont ende wanderde ende ghinc mit hem in den tempel wanderende ende springhende ende Goede lovende. Ende al dat volc sachen wanderende ende Goede lovende ende sy bekanden, dat hijt selve was, die ter aelmoesen sat tot voer die scone poerte, ende sy syn vervullet van versaghentheden ende van verwonderen in dien dat den crepel ghesciet was.
Doe sy Petrum ende Johannem saghen, liep al dat volc verwonderende tot hem luden totter hallen, die Salomons gheheyten is. Doet Petrus sach, antworde hy to den volke: Ghy Israelsche manne, wat verwondere ghy u in desen werke of waer toe sie ghy op [ons] als recht of wy desen cropel in onser moghentheyt of guedetirenheyt hadden doen wanderen? Abrahams God ende Ysaacs God ende Jacobs God, onser vaderen God, heeft glorificiert Ihesum sinen sone, dien ghy over ghelevert hebt ende gheloghent voer Pylatus anghesicht, nochtan al gaf Pylatus dat ordel, dat men quijt laten soude. Mer den hilghen man ende den gherechtighen loghende ghy ende eyschede enen man, die manslactich was, ju ghegheven te werden, mer den maker des levens versloghet ghy, dien God van den doden verweckede, wes ghetuych wij sijn, ende in den ghelove sijns namen heft hy den verwecket, die ghy ghesien ende ghekennet hebben ende sinen name vast ghemaket ende tghelove, dat overmids hem is, gaf dese gheheel ghesondicheyt in juwer alre theghenwordicheyt. Ende brueders, nu weet ict, dat ghyt overmids onbekentheden ghedaen hebt alsoe juwe princen oec hebben [ghedaen], mer God, diet te voren doer der propheten mont gheboetscapt heeft, dat sijn Cristus liden solde, die heeftet aldus vervullet. Daer om hebt berou ende waert bekeert, op dat juwe sonden of ghedaen werden, want die tide der vercolinghe van den aensichte des Heren sijn ghecomen ende hij hevet Ihesum Cristum ghesendet, die in ju ghepredict is, dien die hemel ontfanghen moet thent in den tiden, dat alle dinghe weder ghesettet werden, die God van den beginne der werlt doer sijnre hilgher propheten mont ghesproken hevet. Moyses sprach: Juwe Here God sal ju vyt uwen bruederen enen prophete verwecken, den suelt ghy horen als my na al dat hy ju segghen sal. Het sal wesen, dat elke siele [die] den prophete niet en hoert, die sal van den volke vyt ghesundert werden. Ende alle die propheten, die van Samuel te hijr toe ghesproken hebben, die hebben dese daghe gheboetscapt. Mer ghy sijt kinder der propheten ende des testaments, dat God ordinijrde tot onsen vaderen, sprekende tot Abraham: Alle ghesinde der eerden sullen in dinen sade ghebenediet werden. God heeft ierst sinen sone, dien hy verweckede, ju ghesendet, ju benediende, op dat hem een yeghelich van sijnre quaetheyt bekere.
Auteursrechtelijk beschermd