Nieuwe testament (Noordnederlandse vertaling)

III

Het was een mensche vanden Pharizeen, een prince der Joden, die Nycodemus hiete. Dese quam des nachtes tot Ihesum ende seyde hem: Rabbi, wij weten dattu van Gode ghecomen biste meester, want nyement en mach dese teykene doen, die du doest, het en si dat God mit hem ware. Ihesus antworde ende seyde hem: Voerwaer, voerwaer segghe ic di: Het en si dat een yeghelic van nuwes gheboren werde, hien mach dat rike Godes niet sien. Doe seyde Nycodemus tot hem: Hoe mach een mensche gheboren werden als hi olt is? Mach hi anderwerf in sijnre moeder lichame gaen ende werden gheboren? Ihesus antworde: Voerwaer, voerwaer segic di: Het en si dat een yeghelic verboren werde vanden water ende vanden gheeste, hi en mach in dat rike Godes niet ingaen. Dat vanden vleysche gheboren is, dat is vleysche, ende dat uten gheest gheboren is, dat is gheest. En verwonder di niet, dat ic di seyde: Ghi moet van nyes gheboren werden. Die gheest gheestet daer hi wil en[de] du hoerste sijn stemme, mer du en weteste niet, wan hi comet of waer hi gaet. Alsoe is eelc die uten gheest gheboren is. Doe antworde Nycodemus ende seyde hem: Hoe moghen dese dinghen ghescien? Ihesus antworde ende seyde hem: Bistu een meester in Israhel ende dit niet en weteste? Voerwaer, voerwaer segghe ic di: Dat wij weten, dat spreken wij, ende dat wij ghesien hebben, dat tughen wij, ende onse ghetughe en ontfanghe ghi niet. Of ic u eertsche dinghen gheseyt hebbe ende ghi die niet en ghelovet, of ic u hemelsche dinghen seyde, hoe soude ghi die gheloven? Ende niement en climmet inden hemel dan die vanden hemel ghecomen is, die zone des menschen, die inden hemel is.

Ende des ghelijcs als Moyses dat serpent verhief in der woestinen, alsoe moet des menschen sone verheven werden, op dat eelc die in hem ghelovet, niet verlo\ren

[fol. 52v]

en werde, mer ewich leven hebbe. Want alsoe hevet God die werlt ghemint, dat hi sinen enighen sone gaf, op dat soe wie in hem ghelovet, niet verloren en werde, mer ewich leven hebbe. Want God en hevet sinen sone in die werlt niet gheseynt, dat hi die werlt verdoeme, mer dat die werlt overmids hem behouden werde. Die in hem ghelovet, en wort niet verordelt, mer die niet en ghelovet, die is te hans verordelt, want hi niet en ghelovede inden name des eens gheborens zones Godes. Dit is dat ordel, want een licht is in die werlt ghecomen ende die menschen hebben meer die duusternisse ghemint dan dat licht, want hoer werken waren quaet. Ende soe wie quaet doet, die hatet dat licht ende en comet totten licht niet, op dat sine werke niet berispet en werden, mer die die waerheyt werket, die comet totten licht, op dat sijn werken gheapenbaert werden, want si sijn in Gode ghewracht.

Hier nae quam Ihesus ende sine jongheren inden lande van Judeen ende daer woenden si mit hem, ende hi doepte. Johannes was oec doepende in Emon bi Salim, want daer voel waters was. Ende si quamen ende worden ghedoept. Nochtan en was Johannes inden kerker niet gheleyt.

Doe wart daer een questie van Johannes jongheren mitten Joden vanden doepsel. Ende si quamen tot Johannem ende seyden hem: Meester, die mitti over die Jordane was, dien du tghetughe gaveste, sich, die doept ende si comen alle tot hem. Johannes antworde ende seyde: Die mensche en mach niet ontfanghen het en si hem vanden hemel ghegheven. Ghi selve ghetughes mi, dat ic gheseyt hebbe: Ic en bin Cristus niet, mer dat ic voer hem gheseynt bin. Die die bruut hevet, die is die brudegom, mer des brudegoms vrient, die staet ende hoert hem, hi verblijt mit vrouden um die stemme des brudegoms. Daer um is mine vroude daer in vervult, dat hem behoert te wassen ende mi te verminren.

Die van boven ghecomen is, die is boven al; die vander eerden is, die is eerde ende hi spreect vander eerden. Die vanden hemel quam, die is boven hem allen, ende dat hi ghehoert ende ghesien heeft, dat ghetughet hi ende niement en ontfanghet sine ghetughe. Die sine ghetughe ontfinc, die teykende, dat God warachtich is. Want dien God gheseynt hevet, die spreect Godes worde. God en ghevet den gheest niet bi maten. Die vader mint den zone, ende alle dinc heeft hi in sinen handen ghegheven. Die in den zone ghelovet, die hevet ewich leven, mer die den zone onghelovich is, die en sal dat leven niet sien, mer die gramscap Godes blivet op hem.