Nieuwe testament (Noordnederlandse vertaling)

X

Hier nae teykende die heer tweentsoventich ander jongheren ende hi seyndese twe ende twe te gader voer sijn aensicht in allen steden, daer hi toecomende was, ende hi seyde hem: Des bouwes is vole ende luttel werclude. Biddet daer om den heer des boues, dat hi werclude

[fol. 39v]

in sinen bouwe seynde. Ende siet, ic seynde u als lammer onder die wolve. Daer um en wilt ghenen zac draghen noch scorpe noch ghescoete, ende en gruetet niement biden weghe. In wat huse ghi ingaet, ten iersten segghet: Vrede si desen huse. Ende is daer een kijnt des vreden, u vrede sal daer op rusten, ende is des niet, hi sal weder tot u keren. Blivet inden selven huus etende ende drinckende dat bi hem luden is, want een warcman is sijn loens wardich. Ende en wilt niet van huse toe huse gaen. Ende in wat stat ghi in comet ende si u ontfanghen, etet datmen u voer settet, ende maect die zieken ghesont, die daer in sijn, ende segghet hem: Dat rike Gods sal u naken. In wat stat ghi comet ende si u niet en ontfanghen, gaet uut in horen straten ende segghet: Die vuelnisse oec, die u aenhenghet, sullen wij af veyghen van uwer stat in u. Nochtan weet dat dat rijke is ghenaect. Ic segghe u, dat dien van Sodoma in dien daghe ghenadeliker wesen sal dan diere stat.

Wee di, Corosaim, wee di Bethsayda, want hadden in Tyro ende in Sydone die doghede ghewrocht gheweest, die in di ghesciet sijn, si hadden hier voermaels in asschen te sitten ende in haren clederen penitencie ghedaen. Nochtan sal Tyro ende Sydone ghenadeliker inden oerdel wesen dan u. Ende du, Capharnaum, du bist totten hemel verheven, du salt totter hellen neder gheworpen werden.

Die u hoert, die hoert mi ende die u versmaet, die versmaet mi; die mi versmaet, die versmaet den ghenen die mi gheseynt hevet.

Doe keerden die twe ende tsoventich mit vrouden weder ende seyden: Heer, die viande sijn ons oec onderdaen in dinen name. Ende hi seyde hem: Ic sach den viant als een blicsomme neder vallen vanden hemel. Ende siet, ic heb u die macht ghegheven te treden op serpenten ende scorpione ende op alle moghentheyt des viants, ende u en sal niet deren. Nochtan en wilt u in dien niet verbliden, dat u die gheesten ondergheworpen sijn, mer verblijt u, dat u name inden hemel ghescreven sijn.

In dier uren verblide hi hem inden Heylighen Gheest ende seyde: Heer, vader des hemels ende der eerden, ic belie, dattu dese dinghen verborghen hebste vanden wisen ende vanden vroeden ende hebstese den kijnderkens gheapenbaert. Mede, vader, alsoe heeftet di behaghet. Alle dinghen sijn mi ghegheven van minen vader ende niement en weet, wie een sone is dan die vader ende wie die vader dan die zone ende dient die zone apenbaren wille.

Doe keerde hi hem tot sinen jongheren ende seyde: Salich sijn die oghen die sien dat ghi siet, want ic segghe u, dat vole propheten ende coninghe begherden te sien dat ghi siet, ende si en saghens niet, ende te horen dat ghi hoert, ende si en hoerdens niet.

Doe stont een meyster vander wit op ende becaerden hem ende seyde: Meyster, wat sal ic doen ende dat ewighe leven besitten? Ende hi seyde hem: Wat is inder ee ghescreven? Hoe leestu? Hi antworde ende seyde: Du salt minnen dinen Heren God van allen dinen herten ende van alle dijnre zielen ende van allen dinen crachten ende van allen dinen ghemoede, ende dinen naesten ghelijc di selven. Doe seyde hi tot hem: Du hebste te recht gheantwort; doe dat ende du salt leven. Doe wolde die hem selven rechtverdighen ende seyde tot Ihesum: Ende wie is mijn naeste? Ihesus sach op ende seyde: Een mensche daelde neder van Iherusalem in Jericho ende gheraecte onder die mordenaers, dien oec beroefden ende wonden ende lietenen half levendich ende ghinghen heen. Het gheviel, dat een priester den selven wech neder quam, diene sach ende ghinc voerbi. Des ghelikes een dyaken, doe hi bider stede was ende hem ghesien hadde. Ende een Sa\maritaen

[fol. 40r]

ghinc dien wech. Doe hi neffens hem quam ende hien sach, wart hi mit barmherticheyden beweghet ende ghinc tot hem ende verbant hem sijn wonden ende goot daer wijn ende olye in, ende hi legheden op sijn paert ende voerdene in die herberghe ende dede hem meysterie. Ende des anderen daghes reycten hi voert twe pennincghe ende gafse den weert ende seyde: Heb sorghe voer hem, ende wattu daer boven uutgheveste, als ic wedercome, ic salt di ghelden. Wie van desen drien duncket di hem die naeste wesen, die onder die moerdenaers gheraect was? Doe seyde hi: Die, die barmherticheyt in hem vertoechde. Ende Ihesus seyde hem: Ganc ende doe du des ghelikes.

Het ghesciede, doe si ghinghen, dat hi ghinc in een casteel. Ende een wijf die Martha hiet, ontfenc hem in hoer huus. Ende deser was oer zuster, hiet Maria, die oec sittende was nevens die voete des Heren ende hoerde sine woert. Mer Martha was sorchvoldich om dien ghewoenliken dienst. Si stont ende seyde: Heer, en achtes du des niet, dat mi mijn zuster alleen laet dienen? Sech hoer daer um, dat si mi helpe. Ende die Heer antworde hoer ende seyde: Martha, Martha, du biste sorchvoldich ende worste verstroyet yeghens vole dinghen, mer eens is noet. Maria hevet dat beeste deel uutvercoren, dat van hoer niet afghenomen en sal werden.