ende Andrieas: Sech ons, wanneer sollen alle dese dinghen beghinnen te eynden ende wat teyken sal sijn, wanneer dese dinghen sollen beghinnen te werden voleyndet? Ihesus antworde ende began hem te segghen: Siet, dat u niemant en bedriege, [want veel sellenre comen in minen name ende segghen: ic bent, ende sellenre vele bedrieghen.] Wanneer ghi horen solt stride ende vermoedinghe der stride, en ontsiet ju niet. Want het moet ghescien, mer noch en is dat eynde niet. Dat volc sal oprisen boven den volc ende rijc boven rijc, ende eertbevinghe sollen wesen tot sommighen steden ende hongher. Dit sijn beghinne des rouwen.
Besiets ju selven. Si sollen u overgheven inden raden ende inden sinagoghen soldi gheslaghen werden, ende om mi soldi staen voer die richters ende voer die coninghe, hem in enen ghetughe. Ende het behoert, dat men ierst dat ewangelium predike in alden volc. Ende als si u henen leyden ende overleveren, en wilt niet te voren dencken wat ghi spreken sult, mer dat u ghegheven wort in dier uren, dat solledi spreken, want ghi en sijts niet, die daer sprect, mer die Heylighe Gheest. Die een brueder sal den anderen verraden in der doot, ende die vader den sone, ende die kijnder sollen opstaen jeghens die olders ende sollense doden. Ende ghi solt ghehaedt wesen van allen menschen um minen name. Soe wie dat volherdet tot inden eynde, die sal beholden bliven.
Wanneer ghi sien solt die onmenschelicheyt des mistroestes staende daer hi niet en soude, diet leest, verstae dat dan die in Judeen sijn, sullen vlien in die gheberchte ende die op dat dacke is, en sal niet neder climmen ende in sijn huus gaen um yet daer uut te nemen, ende die inden acker wesen sal, die en sal niet weder om comen um sijn cleet te nemen. Wee den ghenen die baren sollen ende voetsteren wesen sollen in dien daghen! Biddet, dat dese dinghen des wijnters niet en ghescien. Want die daghe des druckes sullen alsulc wesen hoedanich dat si nye en waren van dien dat God die creaturen sciep tot nu, noch en sollen nummermeer ghescien. Ende en hadde God die daghe niet ghecort, alle menschen en worden niet behouden, mer um die uutvercoren die hi ghecoren heeft, sal hi die daghe vercorten. Ende dan eest dat ju yement seghet: Siet, hier is Cristus, siet, daer is hi, en gheloves niet. Want daer sollen opstaen valsche keersten ende valsche propheten ende sullen gheven teyken ende wonder om te bedrieghen ja die uutvercoren sijn, waert moghelic. Daer om siet ghi toe. Siet, ic hebbe u alle dinc voergheseghet.
Mer in dien daghen nae dier tribulacien sal die sonne verduustert werden ende die mane en sal hoer schijn niet gheven ende die sterren des hemels sollen vallen ende die crachten die in den hemel sijn, sollen beruert werden. Ende dan sullen si den sone des menschen sien comen inden wolken mit groter moghentheyt ende glorien. Ende dan sal hi sijn enghelen seynden ende vergaderen sijn uutvercoren vanden vier wijnden vanden hoghesten der eerden totten hoghesten des hemels.
Leert dese parabole vanden vigheboem: Wanneer sijn telghe teder sijn ende sijn blade sollen spruten, dan suldi kennen, dattet biden zomer is. Ende ghi oec, als ghi dese dinghen siet ghescien, soe wetet, dattet nae bi inden doren is. Ic segghe u voerwaer dat dit gheslechte niet heen liden en sal, alle dese dinghen en sullen ghescien. Hemel ende eerde sollen overgaen, mer mijn woerde en sollen niet overgaen. Van dien daghe of van diere uren en weet niement, noch die enghele inden hemele noch die zone dan die vader alleen.
Siet, waect ende biddet, want ghien weet niet, wanneer dattet tijt is. Recht als een mensche, die pelgrimaedse ghinc ende sijn huus liet, ende gaf sinen knechten beveel\nisse van allen werke, ende den doerwachter gheboet hi te waken. Hier om waect, want ghi niet en weet, wanneer die heer des huses comen sal, des avonts laet of ter midder nacht of ten hanen craye of des merghens vroe, op dat hi niet en come onversiens ende u slapende vinde. Dat ic u segghe, dat segic hem allen: Waket!
Auteursrechtelijk beschermd