Nieuwe testament (Noordnederlandse vertaling)

[fol. 20v]

[Secundum Marcum]

I

Dit is dat beghin der ewangelien

[fol. 21r]

Ihesu Cristi, des sone Gods. Als ghescreven is in Ysaya den prophete: Siet, ic seynde minen enghel voer dijn aensicht, die dinen wech bereyden sal voer di, een stemme des roepens inder woestinen: Bereydet des Heren wech ende maket sine weghe recht. Johannes was inder woestinen doepende ende predikende dat doepsel der penitencien in verlatenisse der sunden. Ende alle dat lantscap van Judeen ende alle die van Iherusalem ghinghen uut tot hem ende worden inder Jordanen van hem ghedoept ende belieden hoer sonden. Ende Johannes was ghecleet mit hare van kamelen ende een peelsen riem om sine leynden, ende hi at wilt honich ende eenre hande cruut ende predicte ende seyde: Een, die sterker is dan ic, sal nae mi comen, wes ic niet werdich en bin nederkniende die rieme ontbinden van sinen ghescoete. Ic doepe u inden water, mer die sal u doepen inden Heylighen Gheest.

Ende het ghesciede in dien daghen, dat Ihesus uut Galileen quam van Nazareth ende wart ghedoept inder Jordanen van Johanne. Ende rechtevoert doe hi op stont uten water, sach hi die hemele open ende den Heylighen Gheest recht als een duve nedercomen ende blivende in hem. Ende een stemme was vanden hemel ghehoert: Du bist mijn gheminde sone, in di heb ic mi behaghet.

Ende cort daer nae dreef hem die gheest inder woestinen ende daer was hi viertich daghe ende viertich nachte ende wart becaert vanden viande. Hi was mitten beesten, ende die enghele dienden hem.

Nae dien dat Johannes ghevanghen was, quam Ihesus in Galileen, predikende dat ewangelium des riken Godes, ende seyde: Die tijt is vervullet ende dat rijcke Gods sal naken. Hebbet berouwe ende ghelovet der ewangelien.

Ende hi ghinc voer bi dat meer van Galileen. Daer sach hi Symon ende Andrieas sinen brueder ende si scoten hoer netten in die zee, want si waren visschers. Ende Ihesus seyde hem: Coemt nae mi ende ic sal u doen werden visschers der menschen. Ende albereet lieten si hoer neette ende volchden hem. Een luttel ghinc hi doe bet voert, daer sach hi Jacob Zebedeus sone ende Johannes, sinen brueder, hoer netten buetende in die scepe. Die riep hi oec. Altehant lieten si horen vader Zebedeus mitten knechten die ghehuert waren mitten scepe, ende volgheden hem.

Doe ghinghen si in Capharnaum ende rechtevoert des saterdaghes ghinc hi in die synaghoghe ende leerdense. Ende alle verwonderden si hem in sijnre leringhe, want hi was lerende als een die moghentheit hadde ende niet als die scriben.

Ende in hoer synaghoghen was een mensche, beseten vanden onreynen gheest, die riep ende seyde: Wat is des di of ons te bet, Ihesu Nazarene? Bistu ghecomen eer tijt om ons te verderven? Ic wet dattu een heylich Godes biste. Ende Ihesus dreygheden ende seyde: Swich stille ende ganc uut dien mensche. Ende die onreyne gheest vercrimpelde ende riep mit luder stemmen ende ghinc uut van hem. Ende si verwonderden hem alle, alsoe dat si onderlinghe vragheden ende seyden: Wat is dit? Welc is dese nuwe leer? In wat machten ghebiedt hi den onreynen gheesten ende si hem ghehoersam sijn? Ende sijn gheruchte ghinc in al dat lant van Galileen.

Doe ghinghen si uut der synaghoghen in Symons huus ende Andreas mit Jacob ende Johannes. Ende Symons swegher lach ende hadde den saghe. Doe spraken si hem van hoer. Ende hi quam tot haer ende nam se bider hant ende buerde se op. Ende altehant was si vanden saghe ghelaten ende si diende hem luden.

Des avents, doe die sonne ghedaelt was, brochten si tot hem alle die ziec waren ende die beseten waren Ende al die stat was vergadert voer die doere. Ende hi maecter voele ghesont, die ghequellet waren van menigherhande ziecten, ende hi warp vole viande uut, ende hi en lietse niet spreken, want si kenneden hem.

Ende des avonts late stont hi op ende ghinc in een woeste stede ende dede sijn ghebede al daer. Symon die volchde hem ende die mit hem waren ende doe siene ghevonden hadden, seyden si hem: Alle soeken si di. Ende hi antworde hem: Laet ons gaen inden naesten durpe ende steden, op dat ic daer oec predicke, want daer om bin ic ghecomen. Ende hi ghinc predikende in hoer

[fol. 21v]

synaghoghen ende in al Galileen ende hi warp die viande uut.

Doe quam tot hem een melaetsche mensche ende bat hem ende knielde ende seyde: Heer, ist dattu wilst, du mogheste mi ghesont maken. Ihesus ontfarmde sijnre ende reckede sijn hant uut ende ruerdene ende seyde tot hem: Ic wil, wes ghereynighet. Doe hi dit gheseyt hadde, rechtevoert ghinc die melaetscheyt van hem ende hi is ghereynicht. Ende Ihesus deden van hem uut ghaen ende verboet hem ende seyde: Sich, dattuet niement en seggheste, mer ganc ende toech di den prince der priestere ende offer voer dattu ghesuvert biste dat Moyses hem gheboet tot enen ghetughe. Ende die ghinc heen ende began te predicken ende dat daer ghesciet was kondich te maken, alsoe dat hi int apenbaer niet in die stat gaen en mochte, mer buten bliven in ruemen steden. Ende van allen siden quamen si tot hem.