sal dit ghescien ende welc is dat teyken dijns toecoemstes ende des eynde der werlt? Ihesus antworde hem ende seyde: Siet, dat ju niemen en verleyde. Veel salre comen in minen name ende segghen: Ic bin Cristus, ende sollenre vole bedrieghen. Ghi sult stridinghe horen ende vermoedinghe der stride. Siet, dat ghi niet versaghet en wert. Dese dinghe moeten gheschien, mer noch en is dat eynde niet. Dat volc sal oprisen jeghens dat volc ende dat een rijc jeghens dat ander ende der solen sterften wesen ende hongher ende eertbevinghe tot somighen steden. Dit sijn alle beghinne des rouwen. Dan sullen si ju over leveren in drucke ende in laste ende sullen u verslaen, ende ghi sult van allen menschen ghehaet wesen om minen name. Dan salre voel ghescandalizeert werden ende onderlinghe malc anderen verraden ende haten. Ende voel valscher propheten sullen op staen ende sullender voel verleyden. Ende wanter dan ongherechticheyt overvloedich wesen sal, soe sal die minne van vole menschen vercouden. Soe wie dat volherdet inden eynde toe, die sal behouden bliven. Ende dit ewangelium des rijcs salmen prediken in al die werlt alden volcke tot enen ghetughe, ende dan sal dat eende comen.
Hier om, wanneer ghi sien sult die onmenschelicheyt des mistroestes staende in dese stede, daer Daniel die propheet af ghesproken hevet, die dit leset, die sie, dat hiet verstae; dan die inden lande van Judeen sijn, sien dat si vlien totten gheberchten, ende die opten dake sijn, en climmen niet neder om yet uut horen huus te halen, ende die inden acker sijn, en keren niet weder om horen roc te nemen. Wee den barenden ende den soghenden in dien daghe. Biddet dat ju vlucht niet en ghescie inden winter noch opten sabbet. Dan sal meerre tribulacie wesen dan ye ghewas vanden beghin der werlt tot nu toe noch nummermeer daer na ghescien en sal. Ende en hadden die daghe niet ghecort gheweest, alle mensche en bleve niet behouden, mer um die ghene die vercoren sijn, sullen die [daghe] vercort werden. Soe wie ju dan seghet: Siet, hier is Cristus, en gheloves niet. Want der sullen upstaen valsche kersten ende valsche propheten ende sullen grote teyken ende wonder doen, ja dat in dwalinghe sollen werden ghebrocht die vercoerne, waert moghelic te ghescien. Siet, ic hebt u te voren gheseyt. Ist dat si u segghen: Hi is inder woesteinen, en gaet niet uut, siet, hi is in heymeliker subtijlheyt, en gheloves niet. Alsoe als dat blinckende schijn vanden Oesten uutgaet ende hem apenbaert al tot inden Weesten, alsoe sal die toecoemst des menschen soen wesen. Soe waer dat lichame is, daer sullen die aerne vergadert wesen.
Voert nader tribulacien dier daghe sal die sonne verduustert werden ende die mane en sal hoer licht niet gheven ende die sternen sullen vanden hemel vallen ende die crachte des hemels sullen beroert werden. Ende dan sal dat teyken des menschen soens apenbaer werden inden hemel ende dan sullen alle die gheslechte der eerden wenen ende sullen des menschen sone sien comen inden wolken des hemels mit groter macht ende moghentheyden ende sal sijn eenghelen seynden mit basunen ende mit eenre groter stemmen ende dese sullen sijn uutvercoerne vergaderen vanden vier wijnden ende vanden oversten der hemelen tot den nedersten toe.
Leert dese parabole vanden vigheboom: Alse sijn telghe noch teder sijn ende sijn blade spruten, soe weetti dattet biden somer is. Alsoe wannere ghi alle dit sien sult, soe wetet dattet bi inden doeren is. Ic segghe u voer waer, dat dit gheslechte niet vergaen en sal, alle dese dinghe en sullen ghescien. Hemel ende eerde sullen vergaen, mer mijn worde en sullen niet vergaen.
Van dien daghe ende ure en weet niemen, noch enghele inden hemel noch die sone, dan die vader alleen. Alsoe alst was inden daghen Noes, alsoe sal des menschen soens toecoemst wesen. Alsoe die lude waren in dien daghen voer die diluvie etende ende drinkende ende brulochtende ende brulocht makende,
Auteursrechtelijk beschermd