Nieuwe testament (Noordnederlandse vertaling)

XI

Ende het ghesciede, doe Ihesus dat eynde, dat hi sinen twalef jongheren gheboed, ghinc hi van dan om te leren ende te prediken in hoeren steden.

Doe Johannes, die inden banden lach, hoerde die werken Cristi, seynde hi twe van sinen jongheren ende vraghede hem: Bistuet die daer toecomende is, of verbeyden wij enen anderen? Ihesus antworde hem ende seyde: Gaet ende boetscapt Johannes weder dat ghi ghehoert ende ghesien hebt: die blinden sien, die cropele wanderen, die melaetsche werden ghereynighet, die doven horen ende die doden staen op, die armen werden inden ewangelie gheleert ende salich is hi, die in mi niet ghescandalizeert en wert.

Doe die heen ghinghen, began Ihesus den scaren te segghen van Johanne: Wat sidi uutghegaen inder wuestinen te sien? Een riet dat vanden wijnde ghejaghet wort? Mer wat si di uut ghegaen te sien? Enen menschen mit sachten clederen ghecleet? Siet, die mit sachten clederen ghecleet sijn, sijn inder coninghe huse. Mer wat sidi uut ghegaen te sien? Enen prophete? Ic segghe u, dat hi meerre is dan een prophete. Dit is hi daer af ghescreven is: Sich, ic seynde minen enghel voer dinen aensicht, die dinen wech voer di bereyden sal.

Ic segghe u voerwaer: onder die kijnder der wive en is nieman meerre opghestaen dan Johannes Baptista, mer die die minste is int rike der hemele, is meerre dan hi. Dat rijcke der hemele lijt ghewelt van Johannes Baptisten daghe toe nu toe ende die gheweelt doen, die gripent. Alle die propheten ende die ewe hebben gheprediket tot Johannem toe, ende wildijt oec ontfanghen: Hie is Helyas, die toecomende is. Die oren hevet te horen, die hoer.

Wien sal ic dit gheslachte gheliken? Het is ghelijc den kijnderen, die inder straten sitten, die horen speelghenoten toe roepen: Wij hebben u ghesonghen ende ghi en hebt niet ghespronghen, wij hebben gheweent ende ghi en hebt niet ghehantslaghet. Johannes coemt noch etende noch drinkende, ende si segghen: Hi hevet den viant inne. Die sone des menschen coemt etende ende drinkende, ende si segghen: Siet, dit is een verslijnder ende een wijn drinker ende der publicaen ende der sonderen vrient. Ende die wijsheyt is gherechtverdighet van horen kijnderen.

Doe began hi den steden, daer vole dogheden in ghedaen waren, te verwiten, dat si ghene penitencie ghedaen en hadden: Wee di Corosaim! Wee di Bethsayda! Want hadden die dogheden in Tyro ende in Sydone ghedane ghewest, die in u ghewrocht sijn, sie solden voer tijts in asschen ende in haeren clederen penitencie ghedaen hebben. Nochtan seg ic u dat Tyro ende Sydone ghenadeliker wesen sal inden daghe des oerdels dan u. Ende du, Capharnaum, al wordestu tot den hemel verheven, du salte weder neder toe der hellen dalen, want hadden in Sodama die doechden gheschiet, die in di gheschiet sijn, si hadden licht toe desen

[fol. 9r]

daghe toe staende ghebleven. Nochtan segghe ic u, dat den lande van Zodama ghenadeliker ghescien sal dan di inden daghe des oerdels.

Indien tiden antworde Ihesus ende seyde: Vader ende Heer hemels ende der eerden, ic belie di, dattu dese dinghen verborghen heveste den wisen ende den vroeden, ende den kijnderkijns hebstu se gheapenbaert. Alsoe vader, want dat voer di aldus behaghelic was.

Alle dinc is mi ghegheven van minen vader, ende niement en kennet den zone dan die vader noch den vader dan die sone ende dient die sone apenbaren wil.

Coemt toe mi alle, die arbeyt ende belast sijt, ende ic sal u vermaken. Buert mijn jucke op u ende leert van mi, dat ic sachmoedich bin ende oetmoedich van herten, ende ghi sult uwer zielen rust vinden, want mijn jucke is zuet ende mijn borden is licht.