Nieuwe testament (Noordnederlandse vertaling)

Hier beghint sunte Matheus ewangelium

I

Dit is dat boec der gheboerten ons Heren Ihesu Cristi Davids sone Abrahams zone. Abraham wan Ysaac, Ysaac wan Jacob, Jacob wan Judam

[fol. 3v]

ende sine bruedere, Judas wan Phares ende Zaram van eenre vrouwen hiete Thamar, Phares wan Esrom, Esrom wan Aram, Aran wan Aminadap, Aminadap wan Naason, Naason wan Salmon, Salmon wan Boos van eenre vrouwen hiete Raab, Booz wan Obeth aen eenre vrouwen hiet Ruth, Obeth wan Jesse, Yesse wan David, den coninc.

David die coninc wan Salomon aen eenre vrouwen, die Urias wijf was, Salomon wan Roboam, Roboam wan Abia, Abias wan Aza, Aza wan Josaphat, Josaphat wan Joram, Joram wan Oziam, Ozias wan Joathan, Joathan wan Achas, Achas wan Ezechiam, Ezechias wan Manasses, Manasses wan Amon, Amon wan Josiam, Josias wan Jeconiam ende sine bruderen in die over vaert tot Babilonien.

Ende nader aver vaert van Babilonien Jeconias wan Salathiel, Salathiel wan Zorobabel, Zorobabel wan Abiud, Abiud wan Eliachim, Eliachim wan Azor, Azor wan Zadoch, Zadoch wan Achim, Achim wan Eliud, Eliud wan Eleaser, Eleaser wan Mathan, Mathan wan Jacob, Jacob wan Joseph Marien man, van welker Marien is gheboren Ihesus, die gheheyten is Cristus. Ende aldus alle die gheboerten van Abraham tot David zijn xiiii ende van David tot die overvaert van Babilonien sijn xiiii ende vander overvaert tot Babilonien sijn xiiii gheboerten.

Mar die gheboerte Christi was aldus. Doe Maria Ihesus moeder ghetruwet was Joseph, eer si vergaderden, was si ghevonden hebbende inden lichame vanden Heylighen Gheest. Joseph, haer man, want hi gherechtich was, en woude hi se niet wroeghen, mer al heymeliken laten. Doe hi aldus dese dinghe dochte, apenbaerde hem die enghel ons Heren in sinen slaep ende seyde hem: Josep, David zone, en ontsich di niet, Marien, dine ghetruwede, te nemen, want dat in hoer gheboren is, is vanden Heylighen Gheest. Sy sal baren een kijnt ende sinen name saltu Ihesum heyten. Want hi sal ghesont maken sijn volk van horen sonden. Dat is altemale ghesciet, op dat vervullet worde dat daer ghesproken is vanden Heer doer den prophete, die seyde: Sich, een maghet sal hebben inden lichame ende sal baren een kijnt ende men sal sinen name heyten Emanuel, dat beduut: God mit ons. Joseph stont op vanden slaep ende dede als hem die enghel des Heren gheboed, ende nam sine ghetruwede ende en kennede se niet tot der tijt, dat si baerde hoeren irsten ghebaerne zone, ende hiet sinen name Ihesum.