Die prosa van die tweede Afrikaanse beweging

§ 12. P. Meyerink.
'n Pionier in Suid-Afrika (1922).

Op skool laat die onderwyser die leerlinge soms 'n denkbeeldige reis maak en vertel dan allerhande besonderhede om daar 'n bietjie realistiese kleur aan te gee. Op dieselfde manier laat Meyerink 'n Hollandse huisgesin in die jaar 1680 uit Rotterdam oorkom na Suid-Afrika. Op saaklike wyse, in korrekte, maar kleurlose taal deel hy ons hul ervarings mee. Die dramatiese momente, soos die afskeid van die familie en die aankoms in die Kaap ‘slaan hy maar liewers oor’ (p. 21), of ‘laat dit aan die verbeelding van die lesers oor’! (p. 38). Die persone wat in die verhaal voorkom is net poppe, wat die skrywer na willekeur gebruik om historiese kennis aan die man te bring. Die familie Harmse kry 'n plaas by Stellenbosch en maak die wildernis bewoonbaar. Een van die seuns gaan met Simon van der Stel saam op die tog na Namakwaland.

[p. 143]

Ook die koms van die Hugenote word beskrywe en dit gee aanleiding tot drie huwelike wat so in die gouigheid in die laaste hoofstuk gesluit word. ‘Kornelis.... het baie omgang gemaak met die sewentienjarige Madeleine; en hulle vriendskap het na 'n rukkie in liefde verander’! Dit is nugtere opsommings van hierdie soort wat die verhaaltjie so eentonig maak. In 'n skoolbiblioteek kan dit egter nuttige dienste bewys.