Nieuw liedboek genaemt den vrolyken speelwagen

Een sollebollighe t'Samen-spraecke tusschen een out Edel-man en een Jonghe Vis-meyt.

Stemme Pater anteum en zijn feum.

Grampeer. VVEest doch eens van my gegroet
Mijn liev' Enghelinne soet,
Comt wat veur, Hoort mon-ceur.
Mijn eens spreken 'k ben ontsteken,
Door de min, Laet my in,
Ghy staet in mijn hert en sin.

Vis-meyt. Wie magh daer soo klaghen gaen,

T'is Grampeer soo ick verstaen,

[p. 85]

 

Wegh van hier Leelijck dier,

 

Met uw' hulten ende bulten,

 

Ouden sot, Rochelpot,

 

Aen uwen neus en baert hanght snot.

 

Grampeer. Wat dat ick moet hoor en siet,

 

Van ons losse Margriet,

 

Gaet maer voort, vuyle poort,

 

Wast uw' vlecken, vuyle plecken,

 

Uyt uw' gat, doet eerst dat,

 

Eer dat ghy my meer bekladt.

 

Vis-meyt Wat wilt desen Baviaen,

 

My oock al verwijten gaen,

 

Ghy zijt vuyl wegh ghy uyl,

 

Wilt vertrecken sonder gecken,

 

Eer ick stijf met ghekijf,

 

Smijt den pis-pot op u lijf.

 

Grampeer. Smijt maer aen ghy duyvels moer,

 

'k Wou den duyvel u wegh voer,

 

Ghy siet ros, als een vos,

 

Vuyle slincke, 'k riecke stincke,

 

Vwen mont, als een stront,

 

Noyt ick vuylder swijn en vont.

 

Vis-meyt. Wegh van hier ghy snottebaert,

 

Want ick ben van u vervaert,

 

Vuylen quant, Niet een tant,

 

Hebt ghy heden, Weest te vreden,

 

Daerom gaet, van de straet,

 

Ghy stinckt vuylder als 't privaet.

 

Grampeer. 'k En ben niet soo vuyl als ghy,

 

Wat wilt ghy seggen van my,

 

Slecht maloot, uw' voorschoot

 

Is vol smetten, wilt op letten,

 

Vuyl fatsoen, uw' Caproen,

 

Wilt die uyt sijn vouwen doen.

 

Vis-meyt. Adieu Grampeer ruttel-broeck,

 

'k Sien u gapen als een snoeck,

 

Toecht Grand' Peer, Een Grand' Meer,

[p. 86]

 

Sonder tanden, Voet en handen,

 

Die zijn rot, rochel pot,

 

Gaet mijn deur die moet in 't slot.