1688. 29. Januarij.
175. SOo ick smorgens mijn devotie hiel, in een verliesen van alle creatueren, wierdt ick soetelijck in-getrocken, ende vont my selven heel rustende in Godt, ende als van Godt overlommert ghewaerwordelijck. Ende soo ick geestelijck Communiceerde, had ick wederom dien soeten hemelschen smaeck, ghelijck ick noch meer gehadt hebbe, ende sagh subitelijck in mijn inwendigh een cleyn Hostie, gelijck-men gemeynelijck nut inde heylige Communie, overlommert met een Goddelijcke claerheyt, soodanigh, dat noch de natuerelijcke Sonne, noch eenighe natuerelijcke ghelijckenisse daer van en can by gebrocht worden: het welck my seer versterckten, ende gaf eenen soeten ende vollen vrede, den welcken ick eenighen daeghen soo ghewaerwordelijck niet gehadt en hadde.
Auteursrechtvrij