Rethoricale wercken

Van Houeerdye, Nijdt ende Ghierichede.

BY Houeerdye wordt menich man
Dies noydt schuldt gheensins ghewan
Verdreuen ende iammerlijcke ontlijft
Ende Ghiericheyt die bedrijft
Datmen nae onrechtuaerdich goedt moet pijnen,
Dat rooft den Coopman vanden zijnen
Daer alder wereldt ghewin by lach
Doen hy in vreden te varene plach
Want hy den goeden tijdt op brachte
Nijdt pijnt, hoemen een gheslachte
Teghens anderen mach maecken onvriendt
Daer gheen onvriendtschap en is verdient
Van beyden zijden, noch noydt en wiste
Nijdt die is moedere van allen twiste
Daer veel iammerhede by gheschiet
Dus is de wereldt int verdriedt
Ende seere gheplaecht met desen drien
Die Godt in duechden wille voorsien.