Rethoricale wercken
(1562)–Anthonis de Roovere–
Auteursrechtvrij
[Folio 66v]
| |
VVat ist als v by verre wandelinghe
De lengde, de wijde, tswereldts bekent // es
Wat ist alst v by sekere handelinghe
Goudt, siluer, ghesteente eenpaer ontrent // es
Wat ist alst v int schouwen present // es
De Sonne rijsende ende wederdalende
Wat ist als v thooghe firmament // es
Met claren sterren schoon licht stralende
Wat ist dat ghy siet, die zee doch halende
Alle de Riuieren diemen oydt kende
Niet ouerloopende, doch cort betalende
Wat ist al, niet, hoement keere of wende
Ghenoechte der wereldt is druck int hende:
Wat ist dat ghy winter siet ende somere
Wat ist dat ghy gars, loof, boom, cooren // siet
Wat ist dat ghy kendt de stercke een vromere
Wat ist dat ghy sulck achter sulck vooren // siet
Gheen mondt cant segghen // gheen ooren hooren // niet
Gheen ooghe en mach zijn versaet int schouwen
Wat ist als ghy blijschap ende thooren siet
Wat ist ghebruyckende wensch van vrouwen
Wat wonder can ons de wereldt brouwen
Staet, Heerschappije, ofte my ander ghiften sende
Al ydelheydt, onseker, ende vol ontrouwen
By proeuene, want waer ick my belende
Ghenoechte der werelt is druck int hende.
Alle dinck is des menschens commere
Met weenen ende schreyen, vry op ghebroedt zijn
Met schreyene cort zijn wy hier ommere
Met schreyene moet van hier ghespoet zijn
| |
[Folio 67r]
| |
Hier moet ons aerme natuere gheuoet zijn
Nv slapen, nv waken, nv eten, nv drincken
Nv hitte, nv coude, nv wel ghemoet zijn
Nv qualijck, int eynde doodt ende stincken
Jst dat wy dan van weldoene mincken
Wee wee, wordt onse eewighe Amende
Ach broeders wilt hier by daghe op dincken
Voorpeysende, eer dat de nacht v schende
Ghenoechte der wereldt is druck int hende.
¶ Prinche.
Prinche hoe lustich, men crijghes versaetheydt
Want sonder verlaetheydt
Alle dinghen begheren hueren tijdt
Ende claerlijck vaet dit, sonder versmaetheyt
Onghepunieerde quaetheyt
Js puer alleene der werelts Jolijt
Want waer elck ghecastijdt in zijnen strijdt
Ouerspel, Manslacht, Ghiericheydt, Nijdt
De wereldt en hilde gheen blijder bende
Maer neens, dies is haer eynde verwijdt
Daermen handen slaet ende tanden bijdt
Sonder cesseren, eylaes aerme blende
Ghenoechte der werelt is druck int hende.
|
|