Rethoricale wercken
(1562)–Anthonis de Roovere–
Auteursrechtvrij
[Folio 65v]
| |
Dat is, ick en sie in diuersche schare
Nyemandt stille noch openbare
Soe doen dat hy ghepresen wordt
Tvolck is soe met archeden beghordt
Ale dinck aensiende met quaden ooghen
Ten can van quaetheden lanck noch cort
De sonne int water haer schijn ghedooghen
Men heet de gheestelijcke Ypocrijten
Men heet deuote lieden Heriten
Men heet mestverckens de cloosterieren
Men heet de priesters Symoniten
Men heet de sobere splijtemijten
Men heet Leuer Eedters de officieren
Men heetse sot die duecht hanthieren
Men heetse vroom die quaetdoen pooghen
Tvolck en can in gheender manieren
De sonne int water haer schijn ghedooghen.
De minste seydt vanden meesten quaet
De sondaere voordert alle misdaet
De Leecke draecht de gheleerde nijdt
Wie niet ghelooft is inden raedt
Henlieden dunckt datment al qualijck braedt
Doch en kent hy selue vre noch tijdt
Dese tonghen zijn wel vermalendijdt
Die tsduuels ionghen dus queecken en zooghen
Sy en moghen alst blijckt ter werelt wijt
De sonne int water haer schijn ghedooghen.
Tvolck en can hem seluen niet ghelijden
Tvolck doet tvolck op tonghen rijden
| |
[Folio 66r]
| |
Tvolck en can noch coudt noch heedt verdraghen
Tvolck en wildt zijn ouerdaet niet vermijden
Tvolck is schimpich aen alle zijden
Tvolck en can van niemandt duecht ghewaghen
Tvolck vaert secreet met grooten vlaghen
Tvolck is vol lueghenen, men macht betooghen
Tvolck en can op vrienden en maghen
De sonne int water haer schijn ghedooghen.
Het heeft oydt quaedt gheweest en noch // es
Maer veel meeder nv tbedroch // es
Onder de menichte dant te zijne plach
De Jonghe wyen van noode noch zoch // es
Steeckt teghens doude // dwelck eenen troch // es
Daer nyemandt goet deech in kneden mach
Ten leeft nv nyemandt op desen dach
De nijders en pijnen zijn eere om booghen
Tvolck en can in gheen ghesach
De sone int water haer schijn ghedooghen.
Maer lieue vrienden de ruste mint
Acht op clappaerts niet een twint
Die wel doet en derf niet omme sien
Maer die hem seluen luttel onderwint
Met yemande, ick hope hy ruste vindt
Want vele bewinden doet ruste vlien
Dit nieuwe Jaer laete Godt gheschien
Dat alle verdriet moet wte drooghen
Ende elcken die gheerne in dit Engien
De sonne int water haer schijn ghedooghen.
|
|