Rethoricale wercken

(1562)–Anthonis de Roovere– rechtenstatus


Andere ghedicht. DJe Heeren die hooghe peerden rijden Moghen hen seluen wel verblijden Dat sy ter wereldt oyt ghequamen Hem moeten buyghen aen allen zijden
[Folio 31r]
Ende obedieren altoos in tijden Groot ende cleyne diuersch van namen Tis recht, de duecht van haerlieder lichamen Naer experiencie van haerlieder leuen Teeckent haer wt, als roosen wt bramen Lich ick, dat wil my Godt vergheuen. Bouen andere gaet haer scientie Sy wercken rechts naer conscientie Haer doen is milde, en vol charitaten Waerdich zijnse alder reuerentie Want sy doen daghelicx diligentie Om sustineren aerme huysghesaten Voordeel, ghewin, ende alle raten Doen si vreempde als haerlieder neuen Ghiften van looftuyters, sy puer haten Liech ick, dat wil my Godt vergheuen. Haer leuen is een religioen Sy en moghen soe haestelijck niet misdoen Als braemhouwers, deluers, slauen Keerels die draghen ghelapte schoen Die moetent winnen op elck saeysoen Daer sy mede leuen als grauen Soe haerlieder peerden hooghe drauen Soe zijnse met gode hoochst verheuen Niemant salich dan rijcke van hauen Liech ick, dat wil my Godt vergheuen. Aarons kinderen dat heylighe zaedt Dat is der priestelijcker staet Gheeft goet exemple groot metten cleenen
[Folio 31v]
Niet propers en heeft Monninck noch Prelaet Tisser al aerm van gheeste hoe datter gaet Gheen symonie en is in eenen Aflaet ende gratien si verleenen Door Godt, alsoot Godt heeft ghegheuen Sonder ghifte van groote oft van ghemeenen Liegh ick dat wil my Godt vergheuen. Sy hebben van Gode auctoriteyt Ouer de schapen, iae rondt wt gheseydt Om scheeren om vloyen, som ducht ick om eten Sy kennen alle sondich pleyt Dat weet dalmoghende triniteyt Jn Gods stede zijn sy gheseten Wat sy misdoen, si zijnt diet weten Te beteren, claer vinden zijt beschreuen Tis quaet in haerlieder stock ghebeten Liegh ick dat wil my Godt vergheven. Wethouders, Balious, ende tsheeren cnapen Al gherechtich, gheen wt om rapen Fraudeleuse cooplieden, een woordt een duyst Taelmans en lieghen niet, voor dat si gapen Sy spreken voor donnoosele schapen Om hebben en sluyten si niet den vuyst Mate, ghewichte, valt effene gheiuyst Jn gheen ambacht is looshede beseuen Den ghierighen tol, is al versluyst Liegh ick dat wil my Godt vergheuen. Clercken, Pensionarisen, verthoonders Voorwaer gheseydt, en zijn gheen hoonders
[Folio 32r]
Haer eloquentie is Rethorijcke Sy lieden en spreken voor gheen hoonders Van daghe te daghe vinden si wat schoonders Voor het ghemeente by goeder practijcke Haerlieder relaes blijckt int auctentijcke Alle nieuwichede die wordter mede verdreuen Oudt Recht vseertmen in alle wijcken Liegh ick dat wil my Godt vergheuen. Woeckeraers, Wisselaers ende vercoopers Sijn Gods discipelen ende achterloopers Sy doen alsoe Dapostelen daden Van gheltsacken zijn si gheen hoopers Sy maken santen van roouers, stroopers Die onberaden zijn, connense beraden Elcken ontdoen si kisten en laden Jae daer henlieden mach croix aencleuen Liegh ick dat wil my Godt vergheuen. Tappers, Brouwers, Wijntaueniers Sijn alsoe heylich als Reguliers Sy gheuen den volcke ghetemperden dranck Sy vreesen dat dronckaerts cranck bestiers Vander cracht des wijns oft biers Vallen mochten vander banck Of vechten, sy duchten voor ondanck Hen gaet soe nae der lieden sneuen Sy maken wijn, bier, wt duechden cranck Liegh ick dat wil my Godt vergheuen. Prinche. Hoe soude tvolck ter wereldt wel gheuaren Tvolck leeft ofter hemel noch helle en waren
[Folio 32v]
Wie ist die anderen biedt ghelijck Hoe hoogher op dJaer hoe argher maren Niemandt en wil den anderen sparen Charitate en trouwe zijn elck een lijck Deene steeckt den anderen inden dijck Diet al voorpeyst, therte mach hem beuen Niemant leeft wel, hy en is schadt rijck Liegh ick dat wil my Godt vergheuen.

Vorige Volgende

Andere ghedicht.