Fabryk

[p. 5]

foar Anne Wadman

wêrs fan de wrâld joech ik my del
binnen de fêsting fan myn fel.
de iensumheid is myn ûntwyk -
de duvel yn myn eigen hel

de iennichste easken dy 't ik stel:
in stoel, in tafel, in bêd: in sel.
it ryk allinne, yn 'e iensumheid ryk -
de duvel yn myn eigen hel

ik tocht, yn dizze sitadel
sil 't lok ûntbloeie op myn befel,
god yn 'e himel wurd ik allyk -
de duvel yn myn eigen hel

fan god noch duvel wurd ik kjel,
de mienskip is by my gjin tel:
wat dondert my de hele klyk -
de Duvel yn myn eigen Hel