Album Joannis Rotarii (Johan Radermacher)

[fol. 144r]

[92. Anoniem, Requiem over de dood van de Hertog van Guise, 1563.]

Le Requiem de leglise chrestienne en fraunce sur lamort de guise

O dieu en qui seul gist toute notre esperance
Aye compassion des fidelles de fraunce,
Donne nous maulgre ceux qui veulent aleur guise
Mettre ce jeune Roy et son peuple en chemise

Requiem

Nous scavons bien (seigneur) que des saccagementz,
Blasphemes contre toy et des ravissementz,
La vengeance seras: ta parolle est certaine
Et point neviteront tes ennemis la peine,

Aeternam

Regarde il en est temps en ta misericorde
Acheve de coupper des ces meschans la corde
Permission que soit dun los perpetuel
Entre les desireux ton nom fait solemnel,

Dona

Et si tes verges sont encores desployees,
Plus ne soyent contre nous desormais employees
Le mal viendroit a point aux triumviriens
Au rebelles de christ, aux imagineens

Eis

En profond de noz cueurs au fons de tous ennuitz
Nous tavons adresse nos clameurs jours et nuitz
Fay cognoistre combien est ferme le secours
Que tu donnes a ceulx qui vers toy ont recours

Domine,

Combien que nous soyons des pervers aguettez
En tes sainctz mandementz nous sommes arrestez
Et ny aura tyrant qui par tourment aulcun
Nous face de tes loix changer seulement un

Et

Nous peres ont vescu en tenebris obscures
Pourtant avons nous en calamitez sidures:
Mais nous serons soudain de la nuict retirez,
Quant de ta grand bonte nous aura esclairez

Lux

O dieu delivre nous de la race faulsaire
Qui est [-en] a ton cher filz et nostre roy contraire
Et que de ci bienfaict en tous lieux la memoire
Soit entre les humains, et a toy seigneur gloire,

Perpetua

[fol. 144v]

1

Et fay que cy apres tout lunivers on voye

 

Se redresser a toy par la plus seure voye

 

Et soit es champs desertz soit en bourg soit en ville

 

Le clair et beau soleil de ton vraye evangile

5

Luceat

 

Lors sans cesse les tiens seigneur te beniront

 

Quant par arres joyr icy bas se verront

 

Du bien qu as prepare lassus a tes amis

 

Selon qu en ta parolle est seurement promis

10

Eis

 

1563

[Dwars:]

Requiem sur la mort du ducque de Guise.