|
| |
[Lucas beschrijft ons een Exempel klaer]
Na de Wijse: Ick hoord in Syon, &c.
Lucas beschrijft ons een Exempel klaer,
In 't twalefde, datter een mensche waer,
En sprack, meester ghepresen,
Seght mijn broeder dat hy de erve maer
Deyle, met my in desen, alsoo 't moet wesen.
Christus die seyd, mensch, wie heeft my gestelt
Rechter, te deelen uwe erf of velt?
Siet toe, en wacht u mede
| |
| |
Voor gierigheyt, overvloedt, en ghewelt,
Gewelt en gierigheden, baert veel onvreden.
Hier op seyt Christus neen ghelijckenis,
Een rijck mans acker bracht veel vruchten ghewis,
Hy bedacht hem, en seyde:
Wat sal ick doen? 'k heb niet dat seker is,
Waer ick mijn goet in leyde, oft ick wat beyde.
'k Wil af-breken mijn Schuur in desen tijt,
Die grooter maken, en neerstigh zijn met vlijt,
Mijn goeden al, dat my toe-komt subijt,
Men moet voor d'oude Iaren, nu oock wat sparen.
Dan sal ick seggen tot mijn ziel onvervaert,
Eet ende drinckt, ghy hebt veel goet vergaert,
Voor veel Iaren ghepresen,
Leeft nu gherust, maeckt goet chier onbeswaert,
Ghy behoeft niet te vreesen, maer hoort na desen.
Nae dit besluyt, siet, seyde tot hem Godt,
In dese nacht werdt u ziele, o! Sot,
Ghe-eyscht, en ghy moet sterven,
Waer blijft u goet, alle dat groote lot,
Wie sal dat nu be-erven, ende verwerven?
Soo gatet meest die hier veel goet vergaert,
In wellust leeft, en niet by Godt vermaert,
Met alle sijn goe daghen,
Vertreckt van hier tot sijnen qualijck-vaert,
Dan sal nae Schrifts ghewaghen, 't eynd de last draghen.
Daerom vergaert hier geen schatten voor al,
't Geeft moeyten en onvreden,
| |
| |
Waer u schat is, 't herte oock wesen sal,
Die leert d'ervarentheden, nae Christus reden.
Wy lesen voort, nae ons Lucas bediet,
Dat Christus seydt, en laet u herte niet
Beswaert zijnde, met sorgen,
Met spijs, of dranck, of neeringe, want siet
Dien dag komt seer verborgen, heden of morgen
Dus waeckt en bidt altijt met neerstigheyt,
Als een trouw knecht die sijnen Heer verbeydt,
Dat ghy weerdigh meught wesen,
Besit u ziele doch met lijdtsaemheydt,
Dat ghy voor God in desen, staet sonder vresen.
Prince, mijn Godt en Heer gebenedijdt,
Ick bid u seer, bewaert my doch altijdt
Slecht ende recht, en my genadigh zijt,
Na u goetheyt bequame, door Christum, Amen.
I.H. Pos.
|
|
Auteursrechtvrij