Ik hie, wie ús ferdigening, foartiid gjin witten hân fan 'e dekreten fan it Konsylje, om't de ynhâld, dêr't ik no kunde fan krige, net faak, lit stean tige faak, yn tsjerke te Snits ôfkundige wie, wylst it Konsylje bepaalde, dat dat it earste jiers barre moast om alle minsken bekend te wurden. Ik bea oan om mei in eed te befêstigjen, dat de besluten fan it Konsylje yn myn bywêzen net ôfkundige wiene. En as der al wat oer fan 'e stoel ôfkundige west hie, dan wie dat net bard mei foarlêzing fan 'e hiele ynhâld en mei bekendmakking fan ienige straf, mar inkeld neffens de haadsaken. Bolema lei fierder út, hoe't nimmen, net allinne te Snits, noch te Ljouwert, noch yn hiele Fryslân him oan dy tiid ta oan it Konsylje steurd hie. Dat wie net it gefal mei itjinge foarskreaun wie oer it tal heffers by de doop en likemin wie der feroaring kommen yn it oangean en it plechtich yn tsjerke sluten fan 'e houliken. Alles barde hjir noch presiis gelyk as foar it Tridentinum. Dêrom hie de easker net it rjocht om fan my de straf te foarderjen, dy't op it net neikommen fan dizze dekreten stie. En as de biskop woe, dat dy hjir yn Fryslân neilibbe wurde soene, dan moast er earst troch ôfkundiging soargje, dat de minsken der hjir mei op 'e hichte kamen.
En doe krige Anna har sin. Alhoewol, wy joegen net mear ta as perfoarst hoegde. It wie ek it foarnaamste argumint dêr't wy op frijsprutsen wurde moasten: it die net bliken, fierden wy oan, dat ik in geheim houlik sletten hie. Om't Anna Dekema dat ûntstried en ik it net tajoech, behalven dan foarsafier't it neffens rjocht bestie. Sa naam ik dan teminsten net mear tebek as wat net wier west hie. Ik hâlde fol, dat wy boaske hiene, mar dêr stie ommers gjin straf op.
Us beslút wie dan ek, dat ik troch it fûnis fan 'e biskop frijsprutsen wurde moast fan 'e eask, ik makke boppedat sels in eask fan 'e kosten.
De prokureur-fiskaal bleau by syn eask. Dr. Ruerd naam daalk myn erkenning oan, dat ik gjin houlik mei Anna oangien hie. Fierders bleau ek hy by syn eask, dy't my feroardielje en de kosten foar my opkomme litte moast.
Auteursrechtelijk beschermd