Dordrechts lijstertje
(1624)–Abraham Aertsz. Plater–Stem: Mocht' altijt dueren het sou wel syn, &c.
CVpido dertel wicht,
Ghy die u lossen schicht,
Schiet door een milt floncker gesicht,
V vlugh vermaen // port my licht aen:
Maer trouwen doet mijn lust vergaen.
'Kheb u soo menichmael,
Met mijn vermogen tael
Geoffert in uws moeders sael
| |
[pagina 56]
| |
Dat u vermaen // my licht can raen:
Maer trouwen doet mijn lust vergaen.
Op't hoochst' u wil ick blus,
Inwendigh, met een kus,
Alst maer mach zijn ey, sus, sus, sus,
Dat u vermaen // my doet bestaen:
Maer trouwen doet mijn lust vergaen.
Ey nimmer sal ick niet,
Soo lang my gonst geschiet,
Droef, onlust hebben oft verdriet,
'K sal u vermaen // niet licht versmaen:
Maer trouwen doet mijn lust vergaen.
Prins Cupido Majoor,
Ick volch het oude Spoor,
Mijn lust blijft noch gelijck als voor,
| |
[pagina 57]
| |
V vluch vermaen // wijst my de baen:
Maer trouwen doet mijn lust vergaen.
Reyn liefd' betoont. |
|