Dordrechts lijstertje

[fol. ††iv]

Klinck-vers.

O DORDRECHTS Helicon! daermen de konst siet leven

Door een gheschict Poëet; een sulcken Dichter hier,

Die weerdigh is de kroon, de croon der Lauwerier:

Want hy door jonst en konst, ons heeft met vlijt ghegheven

Het LYSTER-Lied-boeck soet, in veerskens net geschreven

Met liedtjes sta[t]igh schoon, en oock op Boersch manier,

Om yeder sijn vermaeck te scheppen met plaisier,

En singhen 't gheen hem lust: Waer toe den gheest ghedreven

Wert, tot het Wijs of Boersch, oft van het dertel Wicht.

Wilt dan met Musaes stem, nu singhen sijn ghedicht,

Ter eeren den Poeet, die weerdigh is gheloont

Met loflijck Eer-gherucht, met jonst voor konst altijt,

Op dat sijn Faem niet sterf; hoe wel het Momus spijt,

Maer dat men sijnen naem altijt REYN LIEFD' BETOONT.

Blyft in Christo.