Fowru busi

[p. 1]

Fowru Busi

Fowru Busi ben de wan busi nanga difrenti sortu fowru. Yu ben abi bigi wan, pikin wan, moi wan nanga takru wan. A ben de wan moi presi. Ini Fowru Busi Tingifowru nanga Prodokaka ben tan na ini wan nesi. Tingifowru ben nen fosi Switifowru, bikasi a ben wasi nanga wan switismeri. Te a ben wasi te mamanten, dan winsi yu ben de feifi kilometer fara yu ben kan smeri a switismeri. Dan winsi den tra fowru ben sribi ete, a switi smeri ben wiki den. A ten dati ala den singifowru ben singi ala den moi singi san den ben sabi.

[p. 2]

Ini a busi yu ben abi wan fowru di ben nen Prodokaka. A ben abi moi frei èn fu dati ede a ben abi bigifasi. Te ai waka psa na den tra fowru mindri, ai opo en frei dati den tra fowru musu fu dribi go na wan sei.

Prodokaka ben lobi gowtu, solfru nanga diamanti. Dat' meki a ben fufuru den sani fu den tra fowru. Ma den tra fowru no ben sabi taki na Prodokaka ben fufuru den sani. Ma Pokai ben sabi, bika a ben si ala leisi te Prodokaka ben go fufuru. Ma te Pokai ben taigi den tra fowru taki na Prodokaka ben go fufuru den sani, dan den ben hori strei nanga en. So Pokai no ben span nanga den moro. Fu dat'ede Prodokaka no ben man si Pokai srefsrefi ondro en ai tu. Ala leisi te a ben si Pokai a ben kosi en. Dan Pokai fu en sei ben was' go gi en baka.

[p. 3]

Wan bakadina Ma Doksi san ben kisi wan gowtu eksi fu en granpapa, ben go suku nyanyan na libakanti. Dan Prodokaka waka go na a nesi fu Ma Doksi, dan a swari a gowtu eksi. Dan a frei gwe go na en nesi. Pokai di ben sidon e teki wan fatu, si ala sani. Ma Prodokaka no ben si Pokai. Bika fa Pokai grun, dan te ai sidon mindri den taki fu den bon, yu e denki taki na wiwiri.

Di Ma Doksi doro na oso a luku wantron ini en nesi. Di a no si en eksi a bari krasi fasi: ‘Pokai, yu sabi suma teki mi eksi?’

Pokai taki: ‘Mi taigi unu someni leisi kba dati na Prodokaka e fufuru unu sani. Ma toku unu no wani bribi mi. Mi no man taki nanga unu moro!’

So Ma Doksi Ion go na Prodokaka en nesi. A taki: ‘Prodokaka, Pokai taigi mi taki na yu teki mi gowtu eksi.’

Prodokaka bari wan bigi lafu. A taki: ‘Mi sabi taki yu na a moro don fowru fu ala den fowru. Fa yu kan meki Pokai kisi yu. Mi no sabi noti. Ma pe Pokai de?’

Ma Doksi taki: ‘Luku, ai frei kon.’

Di Pokai saka sei Ma Doksi, Prodokaka bigin kosi Pokai. Dan den bigin feti. Den tra fowru srefi kon luku san e psa. Switifowru di ben go suku nyan farawe, ben kon doro now. Dan so a kon prati a feti. A taki: ‘Sanede meki un e feti so nanga unsrefi?’

Pokai taki: ‘A fufuru fowru disi. Bun langa a ben teki mi solfru eksi. Ne a lei taki na Ma Doksi ben teki mi eksi. Dan now a fufuru Ma Doksi en gowtu eksi. Mi si fa a ben swari a eksi. Mi ben sidon ini a bon dati, ne ai strei nanga mi taki a no en. Ma a bun. Prodokaka, yu kan nyan gowtu, solfru nanga diamanti

[p. 4]

fu kisi yu moi frei. Ma fu olanga ete? Yu fufuruman yu!’

Prodokaka no ben de fu hori moro. A ben wani feti baka, ma Switifowru hori en. So Pokai kon frei gwe. Ma Doksi nanga den tra fowru kon gwe tu. Di Switifowru nanga Prodokaka ben de wawan, Switifowru luku en, a taki: ‘Ala leisi mi e si taki yu nanga Pokai e meki trobi. Fu sanede?’

Prodokaka ati ben bron ete. A taki: ‘Mi sabi taki mi na a moro moi fowru. Dat'ede a no lobi mi. Ma efu a lei ete wan leisi gi mi baka, dan mi o sori en wan moi sani.’

Switifowru no taki noti moro, a kiri a tori. Dan a tra dei di Switifowru ben go sei liba fu go hari en

[p. 5]

baka pikinso, a miti en mati Pokai. Dan a taki Pokai odi. Pokai taki en odi baka. Dan Switifowru aksi en: ‘Fa yu nanga Prodokaka e kisi trobi ala leisi so?’

Pokai piki en taki: ‘Esde yu yere kba dati ai fufuru èn ai dyarusu. Yu musu luku bun nanga en!’

Switifowru taki: ‘Pe yu e go now?’

Pokai piki en taki: ‘Mi e go suku nyanyan.’

Switifowru taki: ‘A bun. Nyan switi.’

Di Switifowru go na oso, Prodokaka aksi en taki: ‘San yu ben taki nanga Pokai?’

Switifowru piki en taki: ‘Na a tori san ben psa esde.’

Prodokaka taki: ‘Fa yu kan taki nanga Pokai, a bobo. Dan yu e bribi en tu san ai taki?’

Switifowru no piki en moro fara, a frei gwe.

Prodokaka ben kan dede kba fa Switifowru no ben piki en. Dan Prodokaka prakseri fu du Switifowru wan hati sani. So a teki a switismeri fu Switifowru dan a gwe go iti en trowe farawe ini wan bun dipi olo. Dan Prodokaka teki konofroku, ayun moksi nanga trasi nanga wan lo tingitingi sani, dan a poti den ini wan tra batra san ben gersi di fu Switifowru. So Prodokaka go poti a batra moi baka tapu a presi pe Switifowru ben kibri en.

Di sribi yuru doro dan Switifowru drai kon baka na oso. A wasi dan a go sribi wantron. Mamanten di a wiki ai singi, ai froiti. A teki a batra bika a no ben sabi san Prodokaka du, dan a go wasi. Fa Switifowru ben gwenti a smeri fu en batra kba, dan sondro a ben wani a kanti a heri batra tapu en skin. Wantron so a flaw fu a tingi smeri. Ala den fowru bigin hari den noso. Den aksi densrefi san e tingi so.

[p. 6]

Prodokaka ben dede fu lafu. Ini en ati ai taki: ‘Hai! Mi kisi en moi.’

Baka wan pisten di Switifowru kisi ensrefi, a lon go wantron na Pokai. A bari: ‘Pokai! Suma du a sani disi nanga mi?’

Pokai taki: ‘Mi ben bari yu nanga a sma nanga san yu e libi na ini wan nesi. Na Prodokaka du a sani disi nanga yu.’

Switifowru Ion go na Prodokaka. A taki: ‘Prodokaka, bigin fu tide mi nanga yu e prati. So wan sani yu no kan du nanga mi. Yu kan gwe nownow noso a o span dya.’

Prodokaka taki: ‘Mi kisi yu moi. Yu ben wani teki rai fu den tra wan. Teki go doro, yu dotdoti sani yu. Luku fa yu e tingi.’

Fa Prodokaka kba taki den sani dati, dan Switifowru hari en wan klap. Dan den tu bigin feti. Den feti, den feti te den kon weri. Dan Krakun kon tapu a feti. Ne Switifowru bigin krei. A taki: ‘Solanga

[p. 7]

Prodokaka no gi mi mi batra baka, dan mi no sa libi en nanga rostu.

Krakun taki: ‘Mi mati, mi sa taki nanga Prodokaka meki a go teki a batra fu yu.’

Ne Prodokaka bari wan bigi lafu. A opo en frei, a waka e koti sker'ai gi ala sma san e luku. Dan a taki: ‘Switifowru, noiti mi sa gi yu yu batra moro. Mi trowe en gwe ini a moro dipi olo san de. Mi no e go taigi yu pe a olo de tu. Bigin fu tide yu nen na Tingifowru, wans' pe yu sa go.’

Ala den tra fowru bigin lafu. Ma Pokai no ben lafu. A bari gi Prodokaka: ‘Mi breiti dati yu e gwe now. Baka di yu du san yu ben wani nanga ala yu bigifasi, pe yu sa go now? Fufuruman yu!’

Prodokaka bari: ‘Pokai, a no yu saak. Ma w'o miti wan dei. Kon fasi mi dan yu sa si!’

Pokai no drai, a lon go fu feti baka. Dan Krakun hori en. Prodokaka opo en frei dan a waka go teki en bagasi. Dan di ai waka gwe dan ala den fowru ben tnapu e luku fa ai gwe. Den bari sani gi en taki soso opo a ben kan opo en frei.

[p. 8]

Sensi a dei dati tu ala den fowru ben prati. Den no ben man nanga a tingi smeri fu Tingifowru. Ibriwan fu den ben go suku tra tanpresi. Ma te nanga now Tingifowru e suku en switismeri. Te yu e si Tingifowru e frei sonleisi na loktu, dat wani taki dat ai suku en switismeri!