|
| |
| |
| |
Fatoe Fransje
Fatoe Fransje ben de wan fatoe meisje. A ben leri foe rolschaatsen na Bakrakondre. A ben de wan prisiri meisje toe. Ala bakadina a ben schaatse tapoe a strati pe a ben libi.
Wan bakadina en mama seni en go bai brede na wenkri. Fransje teki den rolschaatsen foe en, dan a rei gwe. Fransje ben singi. A ben meki wantoe modo nanga a ben rei tranga toe. Dan fa Fransje e doro a wenkri, wan dagoe lon kmoto foe wan prasi èn a bigin lon baka Fransje.
| |
| |
Fransje bigin bari: ‘Mama, kon jepi! Oen kon jepi mi!’ Wantoe boi di ben prei bal na sei pasi hiti wan ston naki a dagoe. So meki Fransje ben kan stop. Fransje blo ben de na tapoe. Fransje rei go na den boi. A taki den boi tangi, dan a go esi go bai a brede gi en mama.
Ma di Fransje e drai baka go na oso, a rei wan tra fasi. Dan fa ai singi, a jere wan sma kari. A drai loekoe èn si dati a ben de en omoe pikin Lucil. A drai go na en. Dan den bigin blo tori. Dan baka wan pisten Lucil taki: ‘Fransje, mi goedoe, mi frijari tide. Mi tapoe tina-aiti jari tide. Mi o dansi tide neti. Joe moe kon, jèrè?’
| |
| |
Fransje piki en taki: ‘We, mi no sabi efoe mi mama o wani meki mi kon. Ma no span. Mi o doe moeiti foe kon.’ Dan na so den prati pasi. Dan Fransje esi go na oso.
Di a doro oso, en mama aksi en: ‘Fransje, pe joe tan so langa? Sensi fo joeroe mi seni joe foe go bai brede. Loekoe tapoe a oloisi. Na siksi joeroe kba. Dan na now joe e doro?’
Fransje taki: ‘Mama, di mi rei go na wenkri, dan wan dagoe lon baka mi. So mi go lontoe. Dan ooktoe mi miti Lucil, dan mi ben taki pikinso tori nanga en.’
Mama taki: ‘Ooooo, ma joe sabi taki joe moe wasi dotisani ete. Dan tokoe joe e tan so langa. A boen. Jere dja, mi no wani foe joe rei den schaatse moro. Gi mi den brede dja, èn psa go wasi den dotisani.’
Fransje no doe noti moro leki a go wasi a dotisani. Di a kba, a aksi en mama: ‘Mama, mi mag go na a frijarioso foe Lucil?’
Mama taki: ‘We, mi taki joe n'e go no wan presi tide! Ma joe no kan gwe toe. Bika djonsro mi o go na tante Nelli.’
Dan Fransje go wasi. Dan baka dati a sroto ensrefi ini en kamra. Di mama gwe wan pisten, Fransje weri en
| |
| |
moi weti japon nanga en soesoe. Dan a teki pasi go na a frijari-oso.
Fa Fransje doro mofo a doro foe Lucii, wan oto rei tranga psa na ini a tokotoko watra na sei a pasi, dati a tokotoko watra flei go tapoe Fransje krosi. A doti en heri skin toe. Fransje wraak. A kosi a man, ma a man no jere
| |
| |
en. Lucil di si san psa, lon tjari wan wasdoekoe gi en. Fransje figifigi en skin, dan a taki: ‘Grantangi. Ma mi no man tan moro. Mi o go na oso, bika mi japon doti toemsi. Ma mi fristen joe, nanga psa wan boen dei moro fara.’
Lucil taki: ‘A boen. Ma wakti.’ Dan Lucil lon go teki wantoe switisani na inisei gi Fransje. Fransje gi Lucil wan bosi dan a gwe. Fosi a doro na oso a njan ala den switi sani.
Di a go na inisei a skreki di a si en mama. En mama iti wan soesoe tapoe en. Mama taki: ‘Fransje, joe n'e jere te m'e taki nanga joe? Joe na angri si skapoe. Te joe wani joe kan doe so wan sani baka, dan joe o si san mi o doe nanga joe! A boen dan. Jèrè, joe e go wasi èn go sribi wantron. No wan njanjan joe n'e njan tide moro. Ooktoe mi no moe jere noti moro!’ Fransje tan pi, èn a doe san a ben moes doe.
A tra dei baka di Fransje doe ala en osowroko, a boro safri gwe. Dan soleki fa a ben gwenti foe schaatse ala bakadina, a ben singi èn meki modo. Ooktoe a ben rei tranga. Fa Fransje psa a oekoe foe a strati, wan man tapoe wan boerikiwagi koti go na letisei foe a pasi. Di Fransje si a man, a ben de krosbei kba. Ma fa Fransje ben rei tranga toe, a no ben man stop toe. So Fransje koti pasi. A rei langalanga go tapoe wan tenti pe wantoe sma
| |
| |
ben e njan èn dringi. A heri tenti fadon tapoe den sma, ma kolokoe, no wan foe den kisi mankeri.
Ma di a drai loekoe. A si taki a tenti fadon, a rei gwe esesi. Dan di a si dati no wan sma ben rei kon na en baka, a go bro ondro wantoe bigi bon na sei pasi. Fransje blo ben de na tapoe. A poeroe den schaatsen na en foetoe. Dan a teki en saka-anjisa èn a bigin wai winti.
| |
| |
A srefi momenti wan boi foe en birti ben rei kon tapoe wan baisigri. Di a si Fransje a bari: ‘Fatoe tonton joe dondon, bikasi joe e njan foeroe tonton.’
Fransje atibron, a bari: ‘Mi o kisi joe! Bontji joe.’
| |
| |
Fransje weri en schaatsen, dan a bigin rei baka a boi. Di a boi drai loekoe, a si dati Fransje bo kisi en, a bigin trapoe moro esi. Den sma tapoe strati ben loekoe so ferwondroe. Toe frow san ben tjapoe na sei strati, wan foe den taki: ‘Frow, loekoe san wan fatoe meisje e doe,’ èn den bigin lafoe.
Dan a boi koti go ini wan strati sei wan bigi gotro. Fa Fransje ben rei tranga a no bo man koti go ini a pasi. So a rei langalanga go tapoe wan man san ben ferfi wan lanteri sei pasi tapoe wan trapoe. A man fadon nanga a ferfi èn morsoe en heri skin. Fransje flei go tapoe wan man san ben tjari wan baskita nanga bakba tapoe en ede. Di a man fadon a lon gwe libi a eri baskita. Fransje graboe a lanteripaal na tapoe a oekoe ori. A teki pikinso blo. Dan a loekoe pe a boi ben de. A boi ben stop na mindri sei foe a pasi. Fransje rei go na en. Fransje poeroe en schaatsen. Dan a taki: ‘Joe wan si dati mi e klap joe?’
Ma bifo a boi piki: ‘Ja,’ dan Fransje ben klap en kba. A boi no libi abra. Den bigin feti leki toe tigri. Den ben lolo kofoe boen toe. Boen foeroe sma ben tnapoe lontoe den. Den feti te den kon doro te tapoe a oekoe. Fransje kisi wan okasi dan a iti a boi go ini a gotro. Den sma bari wan bigi lafoe. A boi lon kon nanga bigi atibron na tapoe Fransje. Ma Fransje ben hori feti nanga en. Den doro te tapoe a bigi pasi taki wan eri verkeersopstopping
| |
| |
| |
| |
ben de. No wan sma ben kan poeroe den. Den ben tranga toemsi.
A ben switi gi foeroe sma foe si taki wan meisje e tnapoe ori feti nanga wan boi. Den boi san lobi tnapoe tapoe a oekoe foe a strati bigin bari: ‘Jeeeeh! Tja go, Dikkie! Doe joe wroko!’
| |
| |
Toe skowtoeman di ben si san ben psa lon go poeroe den. Ma den srefi no ben man hari den poeroe. Dan den naki den wantoe klap nanga a baleta. Wantron den tapoe feti.
Wan foe den skowtoeman taki: ‘Foe sanede oenoe e feti?’
Fransje taki: ‘Na en fosi begin.’
| |
| |
A skowtoeman taki: ‘Boi, joe no e sjen foe feti nanga a meisje?’
A boi piki: ‘Mi taki wawan: “Fatoe tonton, joe dondon bika joe e njan foeroe tonton.” Dan a rei kon na mi baka, dan a naki mi.’
Fransje meki sker'ai gi a boi. Fransje taki: ‘Ma skowtoe, a no mag dreigi mi.’
A boi taki: ‘Na mi mofo. Mi mag taki san mi wani.’
Fransje no ben de foe hori moro. A hari a boi wan klap ini en fesi. Den skowtoe gi Fransje wantoe tik nanga a baleta. A boi ben tnapoe so sjen fasi bika a no ben kan naki baka. Dan den skowtoe kiri a kesekese. Den meki a boi go teki en baisgri. Dan a boi rei go na oso. Ma Fransje no ben kan feni en rolschaatsen. Fransje aksi iniwan sma san a ben si efoe den ben si en rolschaatsen. A soekoe den, ma tokoe a no feni den.
Di a boi doro na oso a ferteri en mama nanga en papa san psa nanga en. En papa gi en wan steifi fonfon. En mama taki: ‘Djonsro mi nanga joe e go na Fransje oso. Joe e go meki en boen nanga en baka.’
A boi taki: ‘Ma mama, mi no o go. A naki mi sondro mi ferwakti wan klap ini mi fesi. Ma foe di den skowtoe ben de dape, mi no naki en baka. Ma mi o kisi en.’
| |
| |
A boi mama taki: ‘Joe boi, fa joe kan taki so wan sani. Joe no mag naki wan meisje.’
A boi piki: ‘Ma mama, en fosi naki. Ai feti leki wan boi. So a boen foe hori slag toe.’
En mama taki: ‘Mi no wani jere noti moro. Go weri joe pata meki wi gwe.’ En no ben wani gwe, ma en mama dwengi en taki a moes foe go.
| |
| |
Fransje no ben doro langa na oso dan a jere wan naki tapoe a doro. Di a opo a doro èn a si taki a ben de a boi nanga en mama, Fransje skreki.
A boi en mama taki: ‘Dag meisje. Joe mama de na oso?’
Bifo Fransje ben wani go kari en mama, en mama ben kon tnapoe na doro kba. A aksi: ‘San psa?’
A mama foe a boi taki: ‘Fa joe e tan, Mefrow? Mi tjari mi boi foe a kon meki en boen nanga Fransje. Bika no langa na baka den feti tapoe strati. Ma mi no feni en moi taki mi boi e feti nanga oemasma.’
Fransje mama taki: ‘We, mi no feni en moi toe taki mi pikin e feti nanga so wan moi boi.’
Fransje di ben tnapoe sei en mama, ben koekoe foe atibron di a jere san en mama taki.
Dan a boi en mama taki: ‘We, now oen kan meki en boen baka.’
Fransje ben loekoe pikinso tòf, ma tokoe a langa en anoe gi a boi. A boi ben sjen. A taki: ‘Mi e aksi joe pardon. Mi no sa doe en moro.’
| |
| |
Fransje taki: ‘Grantangi. Mi no sa feti nanga joe moro.’
Dan baka dati a boi nanga en mama go na oso. Mama tapoe a doro. A taki: ‘Fransje, joe no abi jesi, no? Esde joe kon lati na oso. Tide joe feti. Dan pe den rolschaatsen foe joe de, efoe mi mag sabi dati?’
Fransje piki: ‘Mama, mi lasi den.’
Dan a no ben moi moro gi Fransje. Mama gi en wan steifi fonfon taki a ben didon toe dei nanga korsoe ini bedi. Foe sensi a dei dati Fransje ben arki san en mama ben taki.
|
|
Auteursrechtelijk beschermd
