Princeliicke deuiisen

[p. 174]

LXXIV. Ventura desuper vrbi.

Al loopt de dwase borgerij nu wildt en onghebonden,
Godts handt sal comen op de stadt, van boven afgesonden.

Godt straft de boose in't laetst, die hij langh heeft ghespaert:
Doch door sijn goetheyt groot toont hij heur eerst sijn swaert;

[p. 175]

 

Op dat sij door den schrick heur tot hem moghen keeren.

 

Hij heeft Ierusalem sijn toren willen leeren

 

Met een ghestraelde sterr, seer schrickelick om sien:

 

Nochtans en wouw die stadt dees straffe niet ontvlien:

 

Sij waren soo verblint, dat sij niet wel en saghen

 

Dat sulx een teecken was dat Godt heur woude plaghen.

DE iammerlicke destructie ende plondering van Ierusalem: de welcke door de handen der Romeynen ghebeurde ontrent veertich iaeren nae het Lijden ons Heeren Iesu Christi, gelijck Iosephus ende Hegesippus betuyghen: was te vooren te kennen ghegheven door veel verscheyden teeckenen: ende sonderlingen door eenen seer schrickelicken Comeet: den welcken wel een heel iaer te vooren boven den Tempel staende wiert gesien, als een claer blinckende vierich swaert; als vermanende dat den Goddelicken toren sich woude wreken over het Ioodsche gheslacht, door vier ende bloetstortinge: Het welck oock soo gheschiede, behalven noch den onwtsprekelicken honghersnoot: den welcken aldaer soo gheweldich was, datter naeuws een soo bermhertighe moeder ghebonden is gheweest, die haer eygen kinders ghespaert, ende niet op ghegheten en heeft.