Princelijcke deuijsen

Vis nescia vinci.

[fol. 113r]

Scylurus Cheronees (daer Plutarchus mencie af maect) achterlatende tachtentich sonen, heeft henlieden, liggende in zijn dootbedde ghepresenteert eenen tros oft bussel pijlen, om dat sy elck proeuen souden deen nae den ander, dien tros pijlen te breken. Maer als dese kinderen dat niet doen en consten, ende hem gheseyt hadden dat niet moghelick en was dien te breken: soo heeft hy selue den tros pijlen ghenomen ende die ontbonden hebbende, heeft alle die pijlen deel nae den ander ghebroken: henlieden daer mede bewijsende dat sy, alsoo langhe als sy eendrachtich souden wesen met malcander, souden altijts groot ende machtich blijuen: maer waert dat sy twistich ende tweedrachtich werden ende scheyden van malcander, soo souden sy veracht ende vernielt worden. Tselue exempel mach oock gheseyt wesen vanden steenen vanden eylande Scyrus: de welcke, als Plinius beschrijft,⁺ gheheel blijuende swemmen bouen opt water, maer ghebroken zijnde, sincken sy te gronde. Dese deuijse dan vanden tros pijlen, ende oock die historie ende natuere vande voorseyde steenen, beteekent dat de cracht vander eendrachticheyt onuerwinlick is, sonderlinghe gebonden zijnde metten stercken bant der voorsienicheyt.

+ Plini[...]