Princelijcke deuijsen

[fol. 13v]

Immensi tremor Oceani.

Coninck Lodewijck van Vranckrijck die elfste van dier namen, heeft inghestelt die oerden van S. Michiel, int iaer ons Heeren 1469. ende ordonneerde voor wapen oft deuijse, een gouden halsbant gemaect van schelpen, met dobbel stricken leggende op ketenkens oft goude maillen, aen

[fol. 14r]

malcander vast gemaect, daer inde middel onder aen vast gemaect was een beelde van S. Michiel staende op een rootse, twelcke was hangende voren op de borst. Twelcke hy dede (aengaende het beelde vanden Prince der Engelen) nae volgende zijnen vader Coninc Caerle⁺ die achtste van dier namen, die het selue beelde was voerende in zijn baniere, sonderlinge doen hy zijn intreye dede binnen Rouan: ende dat wt reden (alsmen seyt) dat S. Michiel hem hadde vertoocht op de brugge van Orleans, beschermende de stadt tegen die vreesseliken storm vanden Engelschen. Desen halsbant dan vande Coninclike oerden ende deuijse vanden Ridders der selue oerdene, is een teeken ia een warachtich lijcteeken van haerlieder edelheyt, vromicheyt, eendrachticheyt, ghetrouwicheyt ende vrientscap: ende ooc den prijs ende loon van haerlieder vromicheyt ende hooge daden. Byde costelicheyt ende suyuerheyt vanden goude, wordt beteekent haerlieder hoocheyt ende macht: byde eenveerdicheyt vande schelpen, haerlieder eenveerdich ende eendrachtich broederschap vander oerden, int selue navolgende die raetsheeren oft schepenen van Rome, ⁺ die voor haerlieder deuijse droegen aen huerlieder armen, ooc diergelijcke schelpen. Byde dobbel knopen oft stricken daer de schelpen aen malcander mede vast gemaect

+ Monstre let.

+ Marc. Aurel.

[fol. 14v]

zijn, wort beteekent huerlieder onverwinnelijcke ende ontbrekelijcke eendrachticheyt: ende by het beeldt van S. Michiel die victorie tegen den alder vreesselijcsten viant. Aldus so is dese deuijse ende oerden ingestelt, tot solaes, bewaringhe, ende bescherminghe van desen seer edelen Conincrijcke: ende oock ter ander zijden tot een vreese, grouwel ende verderffenisse vanden vianden des selfs. Was ooc geordineert byden voorseyden Coninc die dese oerden eerst inghestelt heeft, datter maer 36. Ridders souden wesen, die dese deuijse souden moghen draghen, vande welcke hy soude wesen het hooft ende Capiteyn. Van welcke 36. hy terstont denomineerde de vijftiene, die hier onder tot een ghedenckenisse gestelt zijn, om dat sy die alder eerste gheweest zijn.

Hertoghe Kaerle van Guienne.

Hertoge Ian van Bourbon ende Auernge.

Lodewijck van Lutsemborg Graue van Simpol ende Conestabel van Vranckrijck.

Andries de Laual, heere van Loheac, maerschalck van Vrancrijck.

Ian Graue van Sanserre, heere van Bueil.

Lowijs van Beaumont, Heere van foreest ende Plessis.

Lowijs van Totteville, here van Torcy.

[fol. 15r]

Lowijs de Laual heere van Chatillon.

Lowijs de bastaert van Bourbon, Graue van Rousillon, Admirael van Vrankerijck.

Anthonis van Chabannes, Graue van Dammartin, opper hofmeester van Vranckrijck.

Jan de bastaert van Armingnac, Graue van Cominghen, Maerschalck van Vranckrijck ende Ruwaert vander Dolpine.

Ioris van Trimoille, heere van Craon.

Gillebert van Chabannes, heere van Curton, Seneschael van Guienne.

Caerle Heere van Crussol, Seneschael van Potiers.

Tannegui vanden Casteele, Gouuerneur vanden lande van Rousillon ende Sardinien.