Princelijcke deuijsen

[fol. 5v]

Manet in fontem grauis exitus.

⁺Orus Apollo beschrijft dat, die van Egy-

+ Orus Apollo.

[fol. 6r]

pten stelden onder haerlieder heylighe teekenen een van twee linien, te weten een recht ouer eynde staende, onder een ander die dweers daer ouer was liggende, waer by dat sy beteekenden het toecomende leuen: maer van sulcken teeken en wisten sy gheen ander redene oft bescheet te gheuen, dan dat een sonderlinghe bediet was van een Godlijck mysterie. Niettemin soo veel isser af dat sulcken teeken, ghemaect was op de borst van haerlieder afgodt⁺ Serapis. Want Suidas beschrijft, dat als de Keyser Theodosius dede afworpen in Grieken alle die kercken der afgoden, inden tempel van desen afgodt, ouer al gheschildert stonden heylighe letters oft teekenen inde ghedaente van een cruyce. Ten anderen soo schrijft Isidorus,⁺ dat die ouders, als sy tot yemant wilden schrijuen het ghetal vanden volcke dat in eenighen strijdt verslaghen, oft ontcomen was, voor die verslaghen waren maecten sy sulcken letter Θ (als doorschoten wesende) ende voor die ontcomen waren, dese letter Τ. Tot desen propooste verhaelt oock Asconius Pedianus⁺ dat hier voortijts int geuen vande vonnissen, werden ghebruyct drye diuersche letters oft teekens, te weten Θ, tot een teeken datse verwesen waren: Τ, tot een teeken

+ Suidas.

+ Isidorus.

+ Asconius Pedianus.

[fol. 6v]

datse los ende vry ghewesen waren: ende Δ, tot een teeken van wtstellinghe. Aldus soo is dit teeken Τ, een seer goed ende ghelukkich⁺ teeken, twelck oock Moyses wel was bewijsende doen hy opden berch met opghesteken armen was biddende voor sijn volck. Want alsoo langhe als hy sijn armen opstekende was, soo hadden, die kinderen van Israel die ouerhant ouer haer vianden: maer van dat hy die liet sincken, soo moesten sy achterwaert wijcken voor haerlieder vianden.

+ Exod. 17.