Verscheyden bruyloft dichten ende liedekens ghedicht ende gecomponeert by verscheyden gheesten

[p. 91]

Een Liedt ter eeren des Houvvelijcken staets, uyt den cxxviii. Psalm Davids.

WElsalich zijn te achten,

Die God den Heer ontsien;

En nae sijn weghen trachten,

En dwalen noyt van dien.

V handen sullen voeden

Dijn huysghesin met vreucht,

Sult wesen in voorspoeden,

Ghezeghent en verheucht.

Dus sal aen alle zijden

Als eenen vvijnstock groen,

Dijn Huysvrouw dy verblijden,

En groote vreucht aendoen.

Als planten van Olijven

Sult sien wel ghemaniert,

Dijn kindren met den vvijve

V tafel om verciert.

Siet soo wort hy ghezeghent

Die nae Gods wetten leeft,

Sulck weldaet hem bejeghent,

Die hem tot Godt begheeft.

Gods hant die sal u gheven

VVt Syon menich goet:

En sult sien al u leven

Ierusalems voorspoet.

Ghy sult uyt uwen zade

Kints kind'ren mede sien,

Iae vreed' en oock ghenade

Aen Israel gheschien.

D. H.