Hemel-sucht, ofte syne laetste besigheydt: vervattende eenighe stucken des Nieuwen Testaments, als de Gheboorte, Opvoedingh, ende eenighe Wonderdaden onses Heeren iesu Christi
(1649)–Herman Ockes–Stemme: De aerd’ is onses Gods.O Mensch die u selfs dienstbaer maeckt,
Wat is ’t voor dienst die u so smaeckt?
| |
[pagina 45]
| |
Wie mach dijn Heer en Meester wesen.
Is ’t niet de Werelt, ende sond’,
Die u schoon vleyen, doch haer grond’
Is vals, dat sult ghy sien na desen.
2 V Wercken toonen vroegh en laet,
Dat ghy in haer gebieden staet,
V doen is ongherechtigheden:
Haet, valsheydt, twist, en hoerdery,
Bedroch, en groote Hoovaerdy,
Waer toe begeeft ghy dijne Leden?
3 Wat sal doch u besoldingh zijn?
In plaets’ van soetigheydt fenijn,
In plaets van vreughde zwaer ellenden,
In plaets van vrede strijd’ en noodt,
In plaets van ’t leven wel de doodt:
Dit ‘s ’t loon der Wereldt wies’ oyt kenden.
4 Ey keert te rugh verdwaelde Ziel,
De Satan volght u op de Hiel,
Begeeft u Leden Godt ter eeren;
Spreeckt tot hem vry, ghy zijt mijn Godt,
| |
[pagina 46]
| |
Wech Werelt met u bose rot,
Ick sal my tot den Heer bekeeren.
5 Dees’ Oogh’ die ’t ydel steed’s sagh aen,
Die wil ick nu ten Hemel slaen,
Ick sal mijn Mond’ en Tongh bedwingen
Dat sy niet spreeck’ een on-nut woort,
Mijn Oor dat sy geen laster hoort,
Maer ga des Heeren lof uytsingen.
6 Dees Handen die vaeck deden quaet,
Streck ick nu uyt tot beter daet;
Dees Voeten die verkeerd’lijck gingen,
Geleyden my nu in God’s Huys:
Ick soeck te leven stil en kuys,
’t Hert treckend’ af van d’Aertsche dinghen,
7 Ick ben niet meer die ‘k plach te zijn,
Maer ’t is gantsch omghewend met mijn,
Na dat Godts Gheest my quam verlichten,
En ick sijn Leer nam in opmerck;
O Heer, wilt dit begonnen werck,
Ten eynde toe in my verrichten.
|
|