Livia

[fol. A3v]

Inhovt der tragoedie.

Het eerste deel.

LAbinus vermoeden hebbende dat sijn moeder soude bevrucht wesen, schrijft het aen sijnen broeder, ontbiet haer te willen dooden, om dat haer gheslachte dat soo doorluchtich in alle hoocheyt bloeyde, door dese daet gheen vercleynicheydt en soude ghebeuren, Placidus den brief ontfangen hebbende, is seer bedroeft, ontbiet voor antwoorde, dat hy soude doen, als een Edelman voor sijn eere schuldich was, Labinus dese antwoorde naer sijn dul voornemen met onuerstandt ouerlegghende, ghebiedt haer door sijnen dienaer te dooden, maer onschuldich beuonden sijnde ende van den ongherusten gheest des Moeders ghequelt, brenght hem seluen door mismoedicheydt ter doodt.

Het tvveede deel.

Placidus om sijn droefheyt te vergheten gaet met zijnen vrient Diadumenus ter Iacht maer vermoyt sijnde, versoecken d'een aen d'ander, dat elck hem by zijn lief soude leyden, Placidus naer veel weygheringhe leyt Diadumenus by sijn lief Darida, doch by beloften dat van hem gheen ontrouwicheyt en soude ghebeuren.

Het derde deel.

De liefde in Diadumenus d'ouerhandt nemende comt daer wederom cloppen, maer Placidus daer wesende ontstack in toren, gebiedt hem inne te laten, Diadumenus incomende wert van Placidem voor het hooft gheslaghen, waerom hy een van beyder doodt heeft ghesworen.

Het vierde deel.

VVraecke beschuldicht hier zijnen vriendt ende hare begeerte baert een onschuldige doodt want Diadumenus in toren verwoet zijnde gaet hem by den Keyser beclagen, dat hy oorsaecke was van zijns moeders doodt, die hem gebiet gheuanghen te nemen, den Keyser soeckt de saecken te middelen, maer Diadumenus wtsinnich zijnde, wilt hem seluen dooden.

[fol. A4r]

Het vyfde deel.

Den Keyser siende gheenen beteren raet, doet Placidem steruen, schenckt het hooft aen den wraeckgierighen Diadumenus, die verblijt zijnde van sijns vyants doodt niet denckende op sijn nakende ongheluck, wort met den Keyser van des gedooden Prince dienaers ghedoodt.