Dal Bhat Chatni
(1977)–Jit Narain–
[pagina 63]
| |
[pagina 64]
| |
Apan kamjori
Sanskirti ke bahane
aggu-bhaggu bidvan ban jay
pandit biyas pe baithe
sab ke bharmave apne tauriay
khali khopri men ved ke mantar
raih raih ke pagalae
pandit bichara thik se
hindi na samjhe
uppar se sanskrit men abhuay
gaiya gabhin bulva dudhan
phor phor ke samjhave
javan samajh ke pandit ke chalaki
bole apne na jane hamke ka sikhai
sanskirti valan kape apan kamjori
ke dar se
janta se bole eke lev bachay
dher jane soche dui dai havan
kara leb
to hamar sanskirtiya bach jai
hindi sikho hindi parhavo
apan sanskirti lev phaylay
ihi ke put bole
a tu hindi-diploma mi habi
ma mi no sab lees moro
man a bun langa kaba
muh bichkay
sarnami ke bole aili-gaili
sanskirti bigar
na samjhe i bichar ke bhikhmangan
ki ihi se bachal hae abbe talak
okar hindi ke parchar
| |
[pagina 65]
| |
jivan ke nasa
jiye men hae
paylo eke
ban ke khelari
jivan ego khel hae
janle to ka ...
gar khele baji
jital na gail
jite valan
kam nikarin
jivan ke nasa
mahanga paral
saikaran haren
nasa khoj
rahin haen
dukanan ke morsu
duar pe kharen
khel men dhab haen
dhab men safal
ajmave se hajaran
dar gain
jivan i kahe
aisan phanda banay
karoro ke lute
ek dui ke lutave
apne ap ke lute men
nasa botal ke
jivan lute men
nasa jivan ke
bhala pave ke
bura jab pujat ho
to mukhti pave khat
saitan pujo
jivan hae
khali khali
na batti
na joti
hath muri
pe dhare
ankh munke
sochila
apan javani
andhiyar men bati
andher men rahili
ka hoi ab age
| |
[pagina 66]
| |
hamar man jaise
jharal am ke per
apne na moksar bhail
dusarkan khay lein
jatahra phek phek
pharal raha
khay khat
kaccha
chahe pakkal
lagga se
chahe chahar ke
tur leten
to hamar man
atna leriyan
kahe dekhat
admi admi ke
man karat
na apas men
chhua chhut rahat
to kahe jiti ham
bheriya dhasan
chhota sa jivan bhi
barkavan ke hiya
bara sa mehman duniya ke
karat ban karavat haen
khat haen khavavat ban
lut paven to
lut hi jat haen
dharam sanskirti ke
haen i bap
bhasan updes ke nana haen
attiyachar ravan se bara
to bhi mare na jat haen
are maiya ho are bappa ho
are dada re are malik re
aise u log haen oise na
jaise hamlog hain aise thik
eman mauj hae
eman mauj mana le na
kahat ban karavat haen
khat haen gavavat ban
lut paven to
lut hi jat haen
kheti chhoren sahar bhagen
dukh ke bhogen re
kheti valan gaiya duhen
dudhva bechen re
are maiya ho are bappa ho
are dada re are malik re
| |
[pagina 67]
| |
gaiyan duhi ke bechen
chahe pasuri ekar tej hae
chamara ke niche mas ke upar ha
kheti men na kuchh rohe
jhura maris jay jatvake
khethihar ke takdirva men
darara phatal hae
jhandi charhave ke
katha sunave ke
muran karave ke
sab das baje
are eman ka bat hae
pandit ke to chalti hae
u chahe jaise oise kare
pahile u karat raha
malik ke dar ke
ab u karat ba
tem se lar ke
ha tab panditji
karat raha
isvar ke bhakt ban ke
aj kal u jiyat ba
lakshminiya ke sevak banke
pandit ke updes
sarabi sans se
nikarat ba
tamakhu ke dhua
se jada
updes ke mitha
mahak gandhat ba
vais ke karam men
pandit phasal
hak brahman ke
mang rahal
murti ke bhitar
apne khara hoike
bhagvan ke badnam
kar baithal
are e panditan
ke pujaran
pramdata u hae
granthavan men jekar
charcha bhail
pramkhayak pandit ba
jekar honevala
svagat khat
| |
[pagina 68]
| |
bhut pret ke ghar
path dohraval ja hae
hare rama hare krisna
rama rama hare hare
hare krisna hare rama
rama rama hare hare
o parbhu tohar nam
levat jag sansar
tohar muh ke parkas
kaha hove ujiyar
dekha do darsan o ram
kardo duniya ke bera par
tohar bin gahira andhiyar
kaise hove ujiyar
isvar allah masi
sab tohar hae nam
tu bhikhmanga ban ke aj
rove pandit ke duar
banay ke daru ke panchamrit
nasvay ke jantan ke hiya
garib ke jebhi kat ke
pasar ke jiye chandalan ha
barambar ham apne men
apne ke khoj na paila
ber ber ham apne se
dar ke dur bhagila
malik ke ham banda
apne ke khoj
na paila
kaise pai
i malik ke
jon hamse dare
o piyare
muh pe mithai
pith ke pichhe
auro ke mur
ham katila
apne katay
chehra pahin ke
samaj ke
garhuvai dekhaila
dharam jaha na
karam kahi kuchh na
adharam ke duar pe
pap bahe
paurte eman
| |
[pagina 69]
| |
dubakki marila
aur chahila
pun ke dan
kaisan bekamma
bati ham
dusre ke
bharosa chahi
apanval hervay
dusre ke
prem ke bhukhal
sis bhikhmanga ke
dei na paili
tone pe hamar
man mariyada
bilkul banal ba
i sanskirti valan
se hamar jiv
gail kachay
sanskirti bachav
sanskirti bachav
kabbo na sunli
sanskirti barhav
i ohi garib hae
jekare tel chaur
ghar men
tarkari khet men
baki pakave ke
kauno dhang
na jane
na apan bhasa
ke man kare
na larkan ke ijjat
apane pachhim
pausag men
puran dhacha lele
duniya ke mange
ekar man kare
aurat ke bole
natak se bharal hae
bitiya ekar muri
ke babal
dharam ekar
thik hae khali
apane ka jane
bis baras pahile
ekar bap es e batais
din ke muh bhar
gari bakke
| |
[pagina 70]
| |
sanjh ke bhar pleta
le hur
bichhauna pe
gayatri mantra bol ke
rat men sutle abhuay
sanicchar ke murgi kate
gilas chale dana dan
thora charh jay
tab utpat u the
besaram mehrarua
ke nani tak
jay chahar
atvar ke ujjar
soth pahin ke
babu mandir men
aguakar banal
apan bhasan ke
dauran men bole
uch hae bisal hae
bhaiya log
i sanskirtiya ke
lev bachay
ka hae tor sanskirtiya re ...
are u kauno puchhe
ke bat hae
utha lo ramain
parho ved puran
phir pata chali
kaise ka bat hae
kaun kaun tu apne parhle hae ho ...
tose kaun kam re
abbe puchhiye
kay dain
haggi-mutila
nilaj
tu ka sochale
hae hamke re
tore aisan ke
apan jebh men
dharke chalila
tu hamar juta pochh
bas thik hae murukh
tu dhurt hae nasan
ka kari malik
ham sanak jaila
kabbo-kabbo
maf kardo parbhu
ham sanicchar ke
| |
[pagina 71]
| |
tohar nam se
laddu deb bat
ghar pe faryari manave
le dhama dham
bigi poku pe nach
sranan men
uppar se bole
ka ba kaphariyan
ke pas
katha havan
phagua divali
ved puran
bhagvat sanskar
jhandi ramain
milaike
bhakchonhar ke
sanskirti mahan
chal chalan
bhasa pausag
dusar sanskirti
ke lein apnay
khet ke bole
chah ta hae
ham na jab
behtar ham
kin ke khai
per-palo
gai-goru
murgi-chingana
kheti-bari
dhan-pisan
ekar jiv
ke babal
bhaiya nava
sanskirti val
mange sarkar
men kahi kam
dharam sankirti
ke matlab janat
tab na bolat
ber ber eke bachav
mai bap aur larkan ke
apne men
aur gair se bartav
posan palan sath
apan bhasa ke pahchan
| |
[pagina 72]
| |
samaj men
uthe-baithe-bole
aur ka na ka
i sab sanskirti hae
jaise bhi
chhite-bove kate
ke tarikka
haibi-daibi
samhare ke upay
parhai-likhai
sadi-biyah
jhandi-katha
aur sab kamil
dharmik bichar
phir dhove-pahine
gave-bajave
gari-garavja
chugali-chai
natak-vatak
aur katna se
manal kamil
chij va bichar
i sab
parkirti se
mil ke hamar
samaj bhail
admi ke sanskirti
adle badle
har samay men
dusar parbhav
jon na bhave
u khajana
jon sohe
jatne sapre otne
samajik eke banai
ekar nam
hae piyar
aur ekar
nam mohabbat
i dunu ke
joral jai
to ka hoiga
age kauh
mitha-mitha
garam-garam
miliga hava
sapanvan ke
asa sab
pura hoiga
are atna tak
jab rahat
| |
[pagina 73]
| |
tab nam na
hovat piyar
parmatma ke to
dekh na jat
u bichara
saja sunavat
ha... na ek dui
larkan baki
das aur dui
tera bemari bokhar
paitisva barisva
ho jat ba garh
kamaiya ke
ka kahi
desva bemar
ha... chor ke
nabab babu
jag ke
pardhan ba
mur katat khat
to bhi jag
barhat jat
om maro
luto khavo
parmatma
dhaniyabad namam
chahe koi ke
pet bharal
chahe na
bharal hoi
hamar kam
bana banal
svaha
jon bihan
kare ke
aj karle
bihan dusar
thagai dhab
bichar liho
svaha
parmatma matlab
par atma ke
gardan men mala
pahinay ke
bhajan gay liho
sab pap chhama
hoi jaiga
svaha
|
|