Gheestelycke plantaige van gheestelijcke op-climmende boomen

[p. 34]

Siende de cortigheyt van haer daeghen begeert tijt om haeren druck te beweenen.

Stemme.
Almachtigh Godt u loven wy: Oft ô liefste lief waer zijt ghy nu?

1.

O Godt ick sie wel in dit dal
Dat mijne daeghen eynden al,
s'En connen hier niet langhe dueren
Volghens den wyser der natueren.

2.

Al leef ick hier op dit termyn

K'en ben maer eenen sonneschyn;
Compter een wolck op my gheresen
Sy maeckt my schyneloos te wesen.

[p. 35]

 

3.

 

Al toon' ick hier een blomme moy

 

K'en ben maer een en dat van hoy;

 

In't hoy soo com'ick my vertooghen

 

En alst verdrooght k'moet me verdrooghen.

 

4.

 

Om dat my leven is soo cort

 

En lancx om meer noch corter wort,

 

Eer dat ick comme te beswijcken

 

Soo wil ick naer het hemels kycken.

 

5.

 

Ick ben van sin te leven stil,

 

En dat gheheel naer uwen wil:

 

K'wil t'swerelts vreught, dat cort verblijen,

 

Van stonden aen, stellen by syen.

[p. 36]

 

6.

 

Daer by soo wil ick metter daet

 

Van herts beweenen al mijn quaet;

 

En oock by neffens dit beschreyen

 

Soo wil ick my tot deught bereyen.

 

7.

 

Lof gheeft my graci en gheluck

 

da'ck wel mach claeghen mijnen druck;

 

Op dat als ick hier eens sal sterven

 

Het hemel-rijcke mach beerven.

FINIS