Rhetorica, dye edele const van welsegghene

¶ Van simpelijc om gratie te biddene.

ALs den verweerdere het fayt kent, gheen ander sake allegierende tot zijnder defensie, maer simpelijc biddet om gratie. Men sal considereren by redene, als hier naer volcht. Oft hi der stadt oft der ghemeenten meer weldaden dan quaets ghedaen heeft. Oft daer eenighe duecht oft edelheyt inden Suppliant ghelegen es, byden welcken datter eenighe duecht hulpe profijt, oft weluaren af soude moghen comen, waert sake dat hy onghepuniert bleue. Oft hy selue in zijn officien ende regiment rechtueerdich goedertieren ende ghenadich gheweest heeft. Oft zijn misdaet niet en es gheschiet wt haet, nijt, of wreedtheyt, maer om weldoen, ende wt goeder meeninghe. En oft daerom oock anderen menschen onbekent es. Of daer gheen perijckel naevolghen en mach ist dat hi ontgaet. Oft daer ye

[fol. 40v]

mant eenich quaet oft schande af hebben mach. Den beschudder moet veel spreken van die goedertierenheyt ende genadicheyt, van die fortune, van die veranderinghe der saken, om tot ghenadicheyt te verweckene. Den heesscher sal al dye contrarie van die selue plaetsen gebruycken, verhalende ende seer groot makende dye misdaet vanden suppliant. Maer dese cause en dient ter vierschare luttel oft niet, maer wel voor den raet oft voor den Prince.