Rhetorica, dye edele const van welsegghene

¶ Van dat vijfste deel der Inuentie
gheseyt die Refutatie.

REfutatie, dat es een wederlegghinge of reprocieringe, ende niet teghenstaende dat, generalijc te sprekene, alle die scriftueren ende antwoorden vanden verweerdere mogen een Refutatie genaemt werden, nochtans int speciale ende bisonder so wert die refutatie hier genomen voor een reproceringe, wederlegginge, solueringe oft solutie van tgeen datmen tegen ons confirmatie ende blijcken opposeert reprochiert, of soude mogen reprochieren ende opposeren dwelc de iuristen herten saluatie opreprochen

[fol. 17v]

Ende dit gheschiet inder seluer manieren so voren in die Confirmatie gheseyt es. Te wetene, bi redenen, authoriteyten, scriftueren, sententien, exempelen, gelijckenessen, circumstantien van personen, saken, tijt, plaetse, cause, costume ghemeenen voys, ende dier ghelijcke: dienende al ter contrarien van tghene dat ons preiudicieren, oft hinderen mochte. Hier es te noterene, dat so wel in die Refutatie als in die Confirmatie sonderlinge te wachtene es een goede dispositie, dat es beschickinghe, soo voren gheleert es. Want als wij ons cause genarreert ende geproponeert hebben, terstont so zijn die audituers ende iugen verwachtende, hoe ende bi wat redenen ende middelen wij tselue confirmeren ende proberen willen. Daerom sullen wij doen ghelijck die voorsienige oorloochs Capiteynen, si beschicken in die voorgarde, die stoutste ende vroomste knechten, desgelijcx ooc inde achterste garde, maer daer tusschen al dander gemeente, die welcke bi haer seluen cranc zijn, ende luttel oft niet bedrijuen en souden, nochtans want si groote menichte zijn, si helpen dander vrome Ruyters die victorie verweruen. Also sullen wij, naer dat ons cause ghenarreert es, al voren eenighe goede, vroome, warachtighe, oft waerblijckelijcke redenen, authoriteyten, oft scriftueren allegieren tot onser confirmatien dienende daer na andere probabele, redelijcke ende gemeene. Ende want men ghemeenlijck het laetste best onthoudende es: so sullen wij ooc int afscheeden eenighe vroome sake allegieren, dye welcke wij

[fol. 18r]

als eenen strael inden sin vanden audituers achter laten sullen. Biden welcken in deser manieren naer die ordinancie vanden crijschknechten ons plaetsen ende redenen beschickende wij sullen moghen int spreken, also si doen int vechten, die victorie verweruen.