Vermakelijcke bruylofts-kroon, doorvlochten met verscheyden leersame gedichten

[p. 50]

['t Syn heel sot en qua manieren]

Een tongh die nimmer swijgen kan,
Wort meest gehaet van alle man.

't SYn heel sot en qua manieren,
Als een Maeght niet kan bestieren,
Sulck een lit waer door men weet
In der daet al haer secreet,
Dat zy tong noch mont kan dwingen,
En vertelt vast alle dingen,
Met een onbedachte sin,
Aen haer Speel-noot of vriendin,
Die 't dan aerdigh weet te praten,
By de buert, en langhs de straten.
Die soo maeckt het openbaer,
Dan wordt yder een gewaer,
Wat de Vryer had te seggen,
Hoe hy 't eerst wist aen te legen,
Watter al is om-gegaen,
En hoe dat de saken staen.
Zijn dit niet heel sotte grillen,
Dat ghy niet u tongh kunt stillen,
Van het geen ghy doet of laet,
Dat u eygen mont u slaet?
't Is te slecht, ick moet het laken,
Dat men weet van al u saken,
Wijse Maeght, of Jongh-gesel,
Sulck een doen is Kinder-spel.
Wacht u van uyt school te klappen,
Weest een vyant van het snappen,
Zijt ghy wijs, u tongh bestuert,
Niet te klappen by de buert.