Vermakelijcke bruylofts-kroon, doorvlochten met verscheyden leersame gedichten

[Al wat een Vryer doet 't en mach hem doch niet baten]

Spijtigheyt en baert geen Min.

Al wat een Vryer doet 't en mach hem doch niet baten,

Wanneer een jonge Maeght haer Minnaer soeckt te haten,
Als 't Meysjen is te schuw, en voor de Vryer vliet,
Dan baert de soete Min niet anders als verdriet.
Neen Jantje houdt u rust, en wilt u wat bedaren,
Neemt elders uwen ganck, laet spijtigh Lijsje varen,
Indien ghy niet en meught geduerigh omme-gaen
Gelijck de Min vereyst, soo laet het vryen staen:
Het is de best raet na soeter uyt-gekeken,
Die niet afkeerigh is, noch schuw is om te spreken.