Het boeck der psalmen Davids

De Lofsang Zacharie.

Daerinne Gods vvaerheyt ende bestendicheyt syner beloften vvort hooghghepresen inde verschyninge des beloofden Messie, syne ghenade ende vercondinghe des Euangeliums aenghevvesen. Ende den ampt des voorloopers Iohannis des doopers uytgheleght.

[fol. Cciiijv]

Op de wyse vanden Cxxxvij. Psalm. Luc. i. vers. 68.

68. GOd Israels de Heere sy verheuen,
Die ons besocht end' vrydom heeft ghegheuen.
69. End' zijns heyls horn' om hoogh' heeft opgherecht
Int heyligh huys van Dauid synen knecht.
70. Na t'woort ghegaen uyt den mont der Propheten,
Dien hy zijn raet heeft oyt end' oyt doen weten.
71. * Als dat hy soud' ons vanden vyant vryen,
End' vander hand der ghen' die ons benyen.
72. End' soud' ghenaed' aen onse Vaders doen
Sijns testaments end' heyl'ghen bondts bevroen.
73. End' oock des eed's die hy hoog' hadt besworen,

[fol. Ccvr]

 

Aen Abraham ons' Vader uytvercoren.

 

74. * Dat is, dat hy ons soud' ghenade gheuen,

 

Dat w'onbevreest vry mochten al ons' leuen:

 

(Sijnd' in zijn scherm end' door zijn stercke cracht

 

Bevrijdt end' loss van alle s'vyants macht).

 

75. In heylicheyt end' in oprechte weghen,

 

Van herten trouw' hem dienst gehoorsaem plegen.

 

76. * Maer du kleyn kint salt heeten tot Gods eeren

 

Een trouw Propheet des allerhooghsten Heeren

 

Mits du salt gaen voor Godes aenghesicht,

 

Op dat zijn wegh, bereyt werd' end' gheslicht.

 

77. Om synen volck de salicheyt t'oorconden,

 

Mits d'onverdiend' verghevinghe der sonden.

 

78. * Door onses Gods barmhertigh medelyden

 

Mits welck' ons heeft in dese laetste tyden,

 

Van uyt der hoogt' een heyl'ghe spruyt besocht.

 

79. Op dat hy klaer den ghen' verschynen mocht,

 

Die duysterlincx in s'doodes schad'we treden

 

End' onse voet staen op den wegh der vreden.